Hoe om jou kinders besig te hou die vakansie

Skrywer: Annelie van Jaarsveldt

“Kinders moenie in die water mors nie …” Nou ja, dan moet hulle besig gehou word. Ongelukkig kan almal nie see, na ’n vakansieoord of wildtuin toe gaan nie en is Jan Tuisbly se karretjie hulle voorland. Trouens, party van ons verkies om liewer Kerstyd by die huis te bly. Afrikaans.com gee 10 wenke oor wat jy kan doen om jou kinders gedurende die lang somervakansie besig te hou en hulle voor die televisie en rekenaars weg te kry. Onthou net, pret is die wagwoord!

Kry hulle aan die beweeg. Oefening is belangrik. Gaan stap of ry saam fiets as gesin. As jou tuin groot genoeg is, speel krieket of sokker in die agterplaas. Nie net raak almal fikser nie, maar dit verrig wondere vir die bloedsomloop en die gemoedstoestand.
Hou piekniek in die tuin of slaan tent op in die agterplaas. Dit is ’n lekker manier om sonder veel uitgawes iets “anders” en prettig te doen – en jy hoef nie eers in te pak en ver te ry nie!
Bak en brou. Daar is altyd plek vir koekies in die koskas. Maak koekies bak ’n dag van pret en plesier in die kombuis – selfs die skoonmaak agterna is ’n aktiwiteit! Of laat die kinders besluit wat is op die spyskaart en laat hulle help – kinders eet graag hul “eie” kos.
Begin ’n groente- of kruietuintjie. Daar is min dinge so lekker as om te sien hoe daardie saadjie of plantjie wat jy in die grond gesit het, groei. En dis boonop iets wat nie “opraak” nie omdat die plantjies natgemaak en versorg moet word en uiteindelik geëet kan word. Raadpleeg die internet en jou plaaslike kwekery sal ook kan help om die tuin aan die gang te kry – al is jou tuin selfs kleiner as ’n kombuistafel, of ’n pot of twee op die stoep.
Knip en plak. Party dae is die weer nie lekker vir buite speel nie. Dan is kreatiewe aktiwiteite die antwoord. Moenie daardie afval-karton, oorskietlappies, krale en blinkers weggooi nie en sorg dat daar gom, klei, ’n skêr, penne, potlode en verf in die huis is. Dalk kan hulle vanjaar Kersgeskenke maak, soos ’n mooi boekmerk, ’n yskasmagneet, of gee vir hulle wit koerantpapier of bruinpapier en laat hulle dit versier om as geskenkpapier te gebruik. Onthou jy nog aartappeldrukwerk? (Sny vorms uit ’n aartappel, druk in verf en dan op papier – maklik!)
Gee terug aan die gemeenskap. Winston Churchill het gesê ons maak ’n bestaan deur aan andere te gee. Laat die kinders hul kaste/speelgoedkis uitpak en van hul speelgoed of boeke wat hulle ontgroei het, maar wat nog in ’n goeie toestand is, skenk aan instansies wat dit dan by die minderbevoorregte kinders kan aflaai. Eintlik word daar dan sommer twee vlieë met een klap geslaan, want daar word sommer reggepak ook. Of dalk kan hulle koekies bak en versier en dit by die plaaslike ouetehuis/kinderhuis gaan uitdeel. Baie van die dierebeskermingsverenigings is ook altyd dankbaar vir hulp.
Skermtyd het ook sy voordeel. Rekenaarspeletjies, veral teen mekaar, bly lekker. Of hou ’n fliekaand en kyk saam na DVD’s. ’n Ideale tyd om daardie krismisbed op te maak. O, en moenie die bak springmielies vergeet nie!
Speel bordspeletjies of hou ’n vasvra. Nie net is dit leersaam nie, dit is ook groot pret. So ’n vasvra kan ook oor die internet (Zoom) saam met familielede wat dalk ver woon, gehou word.
Hou konsert. Laat die kinders hul eie konsert bymekaarsit. Daardie ou klere en mamma se krale is net die ding vir “opdress” vir hulle “verhoogproduksie”. Hulle kan selfs uitnodigings maak en die verhoog versier. Die konsert kan selfs opgeneem word.
Laat hulle lees. Besluit saam hoeveel boeke julle die vakansie gaan lees – alleen of saam met jou. Strokiesprente is ook reg. Maak nou elke dag tyd vir lees. Dit is sekerlik een van die belangrikste en noodsaaklikste aktiwiteite waarmee jou kind hom-/haarself kan besig hou.