In hierdie reeks beoog Anzil Kulsen om temas soos onder andere geldsake, gesinseenhede, afsterwe van geliefdes en aanneming, op ‘n maklik verstaanbare manier vir jong lesers aan te bied. Die stories is ook terselfdertyd heerlik om na te luister en sal ‘n aanwins vir enige klaskamer, ouer, ouma, oupa, oom, of tannie wees. Iranda Erasmus is die illustreerder.

Met haar interessante karakters, neem Ismi van Niekerk die jongspan op ’n verbeeldingsreis! Ons leer ken karakters soos Miempie die mier wat konstant geboelie word, ’n Skoenkaloen wat op reis gaan en Manje die skoenlapper, wat in verskillende diere kan transformeer. Dan volg ons ook vir Schalk wanneer hy ’n skattejag aanpak… wat wag aan die einde van die soektog? Kom vind uit! Skop jou skoene uit, trek ’n boek nader en word deel van Afrikaans.com se leesgemeenskap.

Lapa Uitgewers is passievol daaroor om deel van hierdie verskil te wees. Daarom bied hulle ’n groot keur leerhulpmiddels vir alle ouderdomme aan. Dit sluit beide betaalde en gratis materiaal in en beloof om enige klaskamer of huishouding te verryk. Boonop is dit op die kurrikulum gebaseer! Die hulpmiddels hieronder word gratis beskikbaar gestel met vergunning van die uitgewer.

Afgetrede onderwyseres, Jeanette Grobler, vier in 2023 haar 80ste verjaarsdag. Ons weet egter almal, ouderdom is net ‘n nommer, want op die plaas waar sy saam met haar kinders bly, en die Oranjerivier van die stoep af kan sien, bedryf sy steeds ‘n naskool vir die werkers se kinders.

Skryf is nie nuut vir Jeanette nie en sy was maar in graad 8 toe haar eerste storie in Die Jongspan verskyn het. Toe haar eie kinders klein was, het sy stories geskryf vir Siembamba (destyds ‘n radioprogram op die SAUK), asook sketse van haar eie lewe vir Vrouerubriek. Sy het ook jare lank met haar eie poppespelteater die poppe by skole laat dans. Afrikaans.com deel graag 10 van Jeanette se Kadoempie-stories (reeds in 2003 geskryf), want ons wil hê die kleingoed moet steeds in feetjies en kabouters glo.