Skrywer: Alita Steenkamp
ʼn Hele geslag Afrikaanssprekendes het met Liewe Heksie en Wielie Walie grootgeword. Wielie Walie was die gewilde televisieprogram, aangebied deur Magda van Biljon, wat kleingoed voor die televisie vasgenael gehou het. Liewe Heksie het geen bekendstelling nodig nie en verhoogweergawes van haar avonture is steeds deel van die sosiale kalender.
Die FAK het in Desember 2023 op ʼn besondere wyse eer verleen aan nie net Liewe Heksie nie, maar ook Wielie Walie.
Die twee ikoniese kinderprogramme het ʼn spesiale gedenkplek gekry in die FAK se Liedjietuin by die Voortrekkermonument in Pretoria. Hierdie geleentheid het op Woensdag 13 Desember plaasgevind. Dr. Danie Langner, besturende direkteur van die FAK, het na afloop van die geleentheid gesê dat daar besluit is om treffers van dié legendariese verhale in hierdie lewende museum van die FAK te vereer omdat dit ʼn groot rol gespeel het om generasies van die Afrikaanse jeug te help vorm. Dit het vir seker bygedra tot ʼn liefde vir die Afrikaanse taal by baie kinders. Liewe Heksie is die skepping van Verna Vels en dit was eers net ʼn reeks kinderboeke. Daarna het dit ʼn draai gemaak op die radio en uiteindelik was dit ook ʼn baie gewilde televisieprogram. Indien Verna Vels nog geleef het, sou sy waarskynlik baie trots gewees het op hierdie spesiale erkenning van Liewe Heksie. Magda van Biljon het die geleentheid gekry om ʼn paar herinnerings te deel en ook haar waardering uit te spreek teenoor almal wat by Liewe Heksie en Wielie Walie, die televisieprogramme, betrokke was. Ander lede van die Wielie Walie-familie wat die feestelikheid bygewoon het, is Francois Stemmet, Elma Potgieter, Awie Bosman en Gert van Tonder.
