Skrywer: Annelie van Jaarsveldt
As Niamh tussen nou en die eindronde op 8 Oktober as die algehele wenner aangewys word, sal sy Ierland in Frankryk verteenwoordig, wat haar ook die eerste Suid-Afrikaans-Ierse sangeres maak wat aan hierdie gesogte Europese byeenkoms deelneem.
Die 12-jarige Suid-Afrikaner, Niamh Beatrix, wat in Ierland woon, maak geskiedenis op meer as een manier. Niamh Beatrix, wat haar stem gebruik om mense bymekaar te bring en onlangs die harte van baie verower het toe sy eers ‘n Afrikaanse en toe ‘n Engelse ‘cover’-liedjie vrygestel het ten bate van Make-a-Wish Ireland, het op Sondag, 1 Oktober tydens die semi-finaal, deurgedring tot die finaal van die Junior Eurovision Ierland. Met ‘Radio Active’ in Gaeilge, was Niamh die eerste Suid-Afrikaner wat in die eindronde van die Ierse been deurgedring het. As sy tussen nou en die eindronde op 8 Oktober as die algehele wenner aangewys word, sal Niamh Ierland in Frankryk verteenwoordig, wat haar ook die eerste Suid-Afrikaans-Ierse sangeres maak wat aan hierdie gesogte Europese byeenkoms deelneem.
Ons vra alle Suid-Afrikaners:
Stem vir Niamh vanaf 1 – 8 Oktober.
Elke stem gaan tel!
Daar is baie redes en meer as een manier vir Suid-Afrika om agter Niamh Beatrix te staan en haar te ondersteun. Stemme vir haar om Ierland by die Junior Eurovision in Frankryk te verteenwoordig, kan van enige plek in die wêreld by https://bit.ly/voteniamhbeatrix geloods word, uurliks vanaf 1 Oktober tot 8 Oktober, wanneer sy in die eindronde van die Ierse been van hierdie kompetisie sal optree. Of sy as die algehele wenner aangewys sal word om Ierland in Frankryk te verteenwoordig, sal afhang van hoeveel stemme sy tussen 1 Oktober en die einde van haar finale vertoning op 8 Oktober kan kry.
Oor die Eurovision-kompetisie
Die Eurovision Song Contest, ontwerp as ‘n manier om vrede en samewerking tussen lande te vier, is die eerste keer in 1956 uitgesaai. Dit is ‘n internasionale televisie-uitspattigheid waarin lande hul verskille opsyskuif – en selfs omhels. Dit is dus baie gepas dat Niamh wat haar gawe gebruik om te pleit vir insluiting, diversiteit en eenheid goed vaar in die kinderweergawe van die kompetisie.
Nog nuus! Niamh stel op 1 November haar nuwe enkelsnit ten bate van Reach for a Dream, Suid-Afrika, bekend.
Alhoewel Niamh duidelik ‘n diep liefde vir Ierland het, het sy nie haar Suid-Afrikaanse wortels vergeet nie. In November vanjaar stel sy haar eerste oorspronklike Afrikaanse enkelsnit, Kersfees in die Vreemde, ten bate van Reach for A Dream Suid-Afrika uit. “Niamh se Kersliedjie versmelt Keltiese en Suid-Afrikaanse klanke op ’n baie unieke manier,” sê die vervaardiger van Kersfees in die Vreemde, Riaan Steyn van Traxtudio, Kaapstad. Die liedjie, wat ook stemme van die Suid-Afrikaanse Jeugkoor bevat, is ‘n eerste in sy soort en beeld uit hoe Kersfees anders en tog dieselfde is vir mense regoor die wêreld. “Dit gaan oor hoe Kersfees, soos musiek, mense bymekaar bring – ongeag kultuur, land of taal,” sê Niamh oor die liedjie wat sy gekomponeer het. “Ek het Reach for a Dream gekies omdat die liefdadigheidsorganisasie ‘n onvergeetlike verskil maak in die lewens van kinders met lewensbedreigende siektes – kinders wat baie dikwels Kersfees in die ‘onbekende’ moet deurbring,” verduidelik die jongeling. “Die liedjie en fondsinsameling is ook geïnspireer deur ’n baie spesiale 10-jarige, Carla van Eeden, van Kaapstad, wat al meer as ‘n jaar lank teen kanker baklei,” gaan sy voort.
“Niamh is die toonbeeld van hoop en haar krag en haar moed om voort te gaan om haar drome ‘n werklikheid te maak, is inspirerend,” sê Natalie Lazaris, Besigheidshoof by Reach for a Dream. “Ons is dankbaar dat sy gekies het om Reach For Dream Foundation te ondersteun d.m.v. haar musiek, aangesien dit diegene wat hul grootste stryd veg sal help om hul drome te verwesenlik. Ons is ten volle agter Niamh en sien daarna uit om haar deur hierdie ongelooflike reis te ondersteun.”
Suid-Afrikaners kan hierdie Kersfees-enkelsnit, Kersfees in die Vreemde, ten bate van Reach for Dream South Africa vanaf alle groot platforms stroom wanneer dit op 1 November vrygestel word.
Gaan kyk gerus hier na Niamh se optrede by die semifinaal:
Die liedjie Kersfees in die Vreemde, bevat ook stemme van die Suid-Afrikaanse Jeugkoor.
