Suid-Afrikaners se kosbakke sou baie vervelig sonder haar wees! Die bekende kosskrywer en kosredakteur Carmen Niehaus kuier by Marinda. Marinda maak ’n Marmite-en-kaas-botterkoek, sjokoladeklusters en vrugte-yskasblokkies. Kyk Stoofstories met Marinda op VIA, DStv-kanaal 147 op Woensdae om 17:00.
BOTTERKOEK MET MARMITE EN GERASPERDE KAAS
’n Mens meng net Marmite met ’n bietjie botter en smeer dit oor ’n koek. Sprinkel dan cheddarkaas bo-oor en druk dit vinnig in die oond tot gesmelt.
SJOKOLADEBONDELTJIES
Maak so 40 klein bondeltjies
Wenk: Ek maak deesdae die suiker hier so ’n bietjie minder. Die resep is ook op my TV-program, Jy het ’n wenresep, as wenner aangewys. Daar is dit met klappersuiker gemaak.
250-375 ml (1-1½ k) bruinsuiker
100 g botter
125 ml (½ k) melk (laat hierby ’n bietjie Carmien red mocha tee intrek – so 2 sakkies)
125 ml (½ k) kakao
750 ml (3 k) hawermout
250 ml (1 k) klapper
5 ml (1 t) vanieljegeursel
- Spuit ’n paar velle bakpapier met kossproei of smeer met botter en plaas op ’n bakplaat.
- Plaas die suiker, botter, melk en kakao in ’n groot kastrol. Bring tot kookpunt, roer gedurig en kook dan 5 minute lank.
- Meng intussen die hawermout en klapper en meng by die kakaomengsel in (verwyder dit van die stoof).
- Roer die vanieljegeursel by.
- Skep teelepels vol van die mengsel op die bakpapier – werk vinnig, dit word gou hard. Laat afkoel. Bêre in ’n lugdigte houer.
VRUGTE-YSKASBLOKKIES
Maak 21 blokkies
In die oorspronklike resep kom ook 125 ml (½ k) suiker, maar dan is dit baie soet, so ek laat dit uit.
Pleks van die glanskersies sit ek soms dadels by (maar die rooi is nogal mooi).
115 g botter
1 blik kondensmelk
5 ml (1 t) vanieljegeursel
375 ml (1½ k) rosyntjiemengsel (125 ml daarvan deesdae bosbessies)
125 ml (½ k) glanskersies of selfs dadels (gekap)
125 ml (½ k) grofgekapte gemengde neute
2 pakke Tennisbeskuitjies (ek gebruik deesdae veselbeskuitjies), grofgebreek
- Spuit ’n pan van 18 x 28 x 3 cm met kossproei.
- Smelt die botter en roer die kondensmelk in. Haal van die hitte af en roer die geursel by.
- Voeg die res van die bestanddele by en meng goed.
- Skep in die bakplaat en druk vas met ’n eierspaan. Laat staan 24 uur in die yskas om mooi stewig te word. Sny in vierkantige blokkies.
- Jy kan selfs ’n bietjie klapper bo-oor sprinkel vir die mooi.
Resepkrediet: Stoofstories met Marinda en Carmen Niehaus.
