Na maande se swoeg en sweet het die tyd uiteindelik aangebreek om die wenner van die Afrikaans.com- Skilder met woorde-kompetisie aan te kondig. Afrikaans.com het vanjaar hande geneem met die bekende musikant Anton Goosen en die kunstenaar Elsie Jooste vir die eerste Skilder met woorde-kompetisie waarin ons skoolleerders aangemoedig het om een van Anton se liedjies in ’n kunswerk te omskep.
Die aantal inskrywings was oorweldigend, met kunswerke wat van wyd en syd oor die land ingestroom het. Nie net was dit ’n bewys van die ongelooflike talent van ons land se jong kunstenaars nie, maar ook van die groot liefde wat daar vir die taal is.
Elsie sê die standaard van die Afrikaans.com- Skilder met woorde-kompetisie was ongelooflik hoog, wat die uiteindelike keuse van ’n wenner baie moeilik gemaak het.
“Die standaard was baie hoog en daarom was dit ’n uitdaging om die wenner te kies. Ons het gaan kyk na die uitbeelding van die woorde en hoe dit in ’n storie omskep word. Dan het ons ook gaan kyk na die medium, die tegniek en uitvoering daarvan in elke ouderdomsgroep.”
Dit is met trots dat Afrikaans.com die algehele wenner van vanjaar se Afrikaans.com- Skilder met woorde-kompetisie aankondig.
Baie geluk aan Marisa Steynberg!
Marisa Steynberg – 16 jaar oud – Steynbergtuisskool – Straattroebadoere
Marisa se kunswerk is geïnspireer deur Anton Goosen se liedjie Straattroebadoere en sy het van akrielverf gebruik gemaak in die skeppingsproses.
Marisa stap weg met ’n R2000-kontantprys en ’n verdere R10 000 wat as ’n skenking weggegee sal word.
Volgens Elsie het Marisa se kunswerk onmiddellik haar en Anton se aandag vasgevang. “Elke woord in die liedjie het sin gemaak en die emosie is omskep in ’n uitstekende kunswerk wat spreek van gehalte en vakmanskap. Haar tegniek is iets besonders. Haar kleurgebruik vorm deel van die emosie en die figure in die skildery kom sterk na vore en vorm deel van die fokuspunt. Sy het beslis haar beplanning van die skildery deurdink voordat sy die kwas gebruik het. Sy is voorwaar ’n uitstaande wenner. Mag sy net nooit haar kwas neersit nie.”
Graag wens ons ook die volgende leerders geluk vir hul posisies in die tweede en derde plek van die Skilder met woorde-kompetisie:
Tweede plek: Ashton Fick
Ashton Fick – Gr 9 – CVO Vivo – Hanoverstraat
Derde plek: Tehilla Meyer
Tehilla Meyer – Gr 7 – Victory Christian School – Trompie
Maar, die opwinding van die kompetisie stop nie hier nie. Ons was so beïndruk met vanjaar se inskrywings dat Afrikaans.com dit goedgedink het om ’n verdere twee pryse weg te gee. Die laerskoolkunstenaars het nie vanjaar teruggestaan nie en het ook besonderse kunswerke opgelewer.
Afrikaans.com is daarom trots om ’n spesiale prys vir ’n grondslag- en intermediêre fase-leerder wat uitsonderlike talent getoon het, aan te kondig. Baie geluk aan van die volgende leerders wat elk ’n kontantprys van R500 ontvang. Die skole waarin die betrokke leerders is, sal ook elk ’n R1000-kontantprys ontvang.
Grondslagfase-wenner:
Nika Oosthuizen
Nika Oosthuizen – 9 jaar oud – Laerskool Volschenk – Straattroebadoere
Intermediêre fase-wenner:
Dané Jansen
Dané Jansen – 11 jaar oud – Laerskool Vastrap – Harlekyn
Skeppende kunste is belangrik…
Elsie is uiters passievol oor skeppende kunste in skole en meen dit is ’n behoefte waarvoor sy op die hoogste vlak baklei.
“Ek het al sover gegaan as om navorsing in Amerika te gaan doen vir my meestersgraad om sodoende te gaan kyk hoekom leerders daar soveel meer sukses behaal in vergelyking met Suid-Afrika. [In Amerika] word so baie klem gelê op die kunste en leerders word op ’n gereelde basis getoets vir vakkeuses. Daarom is ek besig met die Wes-Kaapse Onderwysdepartement vir fondse om breintoetse verpligtend te maak in graad nege en graad elf. Leerders, veral in die kunste, word in verkeerde rigtings gestuur en daarom gee hulle moed op en val uit. Hierdie kompetisie het weereens vir my die behoefte aan skeppende kunste beklemtoon en ek en Anton is regtig baie dankbaar dat ons só baie kinders en ook hul ouers kon betrek om skeppend na Afrikaans te kyk.”
Afrikaans.com, Elsie en Anton wil graag dankie sê aan elke leerder wat hul liefde vir Afrikaans met die kwas gewys het en vanjaar deelgeneem het.
Die beoordeling van hierdie kompetisie is onafhanklik deur Elsie Jooste en Anton Goosen gedoen.
Let wel dat elke inskrywing benader is op grond van die ouderdomskategorie waarin die leerder val en daarom beoordeel is op grond van wat van ’n leerder op daardie ouderdom verwag word.
Elke leerder sal na afloop van die kompetisie ’n sertifikaat van deelname ontvang.
