fbpx

14 Oktober 2019

Internasionale Woordeboekdag: 16 Oktober

Ek waardeur jou belangstelling. Dis nou interresant! Die kommitee sal besluit oor die akkomodasierelings

Die meeste van ons kom gereeld in aanraking met spel- en taalfoute. Trouens, ons maak self foute. Tog, as ’n mens ’n bietjie moeite doen en liewer ’n betroubare bron raadpleeg, kan die meeste van hierdie gruwels vermy word. Dis reg … gebruik ’n woordeboek! ’n Goeie woordeboek is nie net #onmisbaar vir goeie kommunikasie nie, maar vergroot ook ons leefruimte en dra by tot ’n breër woordeskat.

Woordeboeke is onmisbaar vir goeie kommunikasie

Internasionale Woordeboekdag word op 16 Oktober gevier en het ten doel om mense bewus te maak van die belangrikheid van woordeboeke as inligtingsbronne.

Die dag word internasionaal ter ere van die Amerikaner Noah Webster gevier. Webster is op 16 Oktober 1758 gebore en was ’n briljante student wat reeds op 15 aan Yale Universiteit begin studeer het. Later word hy die samesteller van die eerste Amerikaanse woordeboek en word hy daarom beskou as die vader van die Amerikaanse leksikografie.

Woordeboeke nou tot almal se beskikking

Deesdae is dit nie meer nodig om verouderde woordeboeke te gebruik of ten duurste die nuutste uitgawe aan te skaf om die betekenis van ’n woord of ’n vertaling na te slaan nie. Elkeen van ons het gratis toegang tot elektroniese woordeboeke  – bloot net met die klik van ’n knoppie. Woordeboeke soos Pharos se aanlyn woordeboeke (’n versameling van algemene en vakwoordeboeke) en die Woordeboek van die Afrikaanse Taal (WAT) is maar twee van ’n hele verskeidenheid. Soms is dit nodig om lid van ’n woordeboekportaal te word teen ’n billike jaarlikse bedrag, maar dit is beslis die geld werd. Een so portaal is die van die Virtuele Instituut vir Afrikaans (VivA).

Woordeboeke wat jy gerus kan aanskaf:

  • Die Viva-app kan gratis op jou slimfoon of tablet afgelaai word en gee jou toegang tot 17 woordeboeke.  Klik hier
  • Besoek ook https://viva-afrikaans.org/winkelvir lidmaatskap en ander aanlyn woordeboeke en hulpbronne.
  • Pharos se Verklarende Afrikaanse Woordeboek (teen R425 op takealot.com).
  • Pharos se Afrikaans-Engels-woordeboek (R439 op takealot.com).
  • Pharos se aanlyn gerief: Dié aanlyn diens het ’n versameling van algemene en vakwoordeboeke. Teen R445 per jaar kry jy toegang tot 15 naslaanwerke. Besoek pharosonline.co.za.
  • Afrikaanse Woordelys en Spelreëls (R345 op takealot.com).
  • Die Handwoordeboek van die Afrikaanse Taal (R419 op takealot.com).
  • Woordeboek van die Afrikaanse Taal (WAT) – verskeie opsies is beskikbaar. Besoek wat.co.za. Jy kan ook ’n woord borg of koop.

Die woord Woordeboek in verskillende tale:

isiXhosa: isichazi-magama
isiZulu: isichazimazwi
Sepedi: pukuntšu
Sesotho: bukantswe
Swahili: kamusi
Frans: dictionnaire
Portugees: dicionário

(met dank: Taalgenoot se FB-blad)

Besoek Afrikaans.com se Taalpretblad waar jy jou taalvernuf kan toets, deel kan neem aan Varsgebekkig en jou nuutskeppinge deel of kan saamspeel met ons trivia-spel.

Afrikaans.com-Taalpret

064 652 6873

JOU Afrikaans tel oral en altyd. Vertel ons met die hutsmerk #jouafrikaanstel waar, wanneer of waarom jou Afrikaans tel. Met ons nuutste veldtog bevestig ons dat jy nooit jou taal hoef prys te gee nie, dat Afrikaans oor globale grense strek en dat ons die verskeidenheid in Afrikaans vier. Kyk hier na die veldtog-video’s en neem deel. Onthou om jou naam, van en van watter geweste jy is, by te voeg.