fbpx

Dr. Seuss-titels … in Afrikaans!

“Horton hoor ’n Hoe!” (Horton hears a who), “Hoe die Grons Kersfees gesteel het!” (How the Grinch stole Christmas)… Afrikaanse titels wat ’n mens sommer lus maak om die boeke aan te skaf en te lees. Kinders word reeds jare lank betower deur die Dr. Seuss-boeke – heerlike tongknopers wat ’n mens skoon uitasem laat wanneer die boeke hardop voorgelees word. Die “slim”, herhalende en prettige rymstories is vol wysheid en lewenslesse – vir oud en jonk – en boonop reeds geruime tyd in Afrikaans ook beskikbaar.

Nog titels waarvoor jy kan soek, is onder andere “Die kat kom kuier”, “Die Loraks”, “Groen ham en eiers” en “Kan ek vir my ’n troeteldier kry?”

Meer oor die skrywer:

Dr Seuss – Theodor Seuss Geisel (1904-1991) – is een van die bekendste en mees vereerde kinderboekskrywers van ons tyd. Hy het meer as 44 boeke geskryf en geïllustreer en selfs ná sy dood, bly sy boeke kinders van alle ouderdomme vermaak en inspireer om ‘n liefde vir lees te ontwikkel.

Skaf gerus ook dié boeke aan:

Diegene wat grootgeword het met die TinTin– en Asterix-reekse, kan ook al geruime tyd die boeke in Afrikaans lees. Trouens, Protea Boekhuis het vroeër vanjaar twee Afrikaanse uitgawes van die immergroen Kuifie-reeks (TinTin) gepubliseer, naamlik “Bestemming Maan” (Destination Moon) en “Verkenners op die Maan” (Explorers on the Moon).

Asterix en Obelix vermaak oud en jonk reeds jare lank en met die puik vertalings van Sonya van Schalkwyk-Barrois (sy het ook die Kuifie-boeke vertaal) is dit ’n leesfees. Name soos Verinniwereldkitikitikkitix en Opsysenuvius vra mos om gelees te word.

Vir meer inligting:

E-pos Potchefstroom@proteaboekwinkel.com of besoek Protea Boekwinkel  en kyk sommer wat Protea vir die Kerskous en vakansie aanbeveel.

Gaan loer ook op die uitgewers se webtuistes en aanlyn winkels vir ’n groot verskeidenheid kinder- en tienerboeke in Afrikaans. Byvoorbeeld:

NB Uitgewers

Loot.co.za

Graffitti Boeke

Human en Rousseau

Lapa Uitgewers

064 652 6873

JOU Afrikaans tel oral en altyd. Vertel ons met die hutsmerk #jouafrikaanstel waar, wanneer of waarom jou Afrikaans tel. Met ons nuutste veldtog bevestig ons dat jy nooit jou taal hoef prys te gee nie, dat Afrikaans oor globale grense strek en dat ons die verskeidenheid in Afrikaans vier. Kyk hier na die veldtog-video’s en neem deel. Onthou om jou naam, van en van watter geweste jy is, by te voeg.