Jana Luther is ’n taalwerker en leksikograaf. Sy is redakteur van die Handwoordeboek van die Afrikaanse Taal (die HAT) en senior taalpraktisyn by die Virtuele Instituut vir Afrikaans.

Die 𝘈𝘭𝘨𝘦𝘮𝘦𝘯𝘦 𝘞𝘰𝘰𝘳𝘥𝘦𝘣𝘰𝘦𝘬 𝘷𝘢𝘯 𝘌𝘪𝘦𝘵𝘺𝘥𝘴𝘦 𝘈𝘧𝘳𝘪𝘬𝘢𝘢𝘯𝘴 (AWEA), wat deur VivA se leksikograaf Jana Luther opgestel en uitgebrei word, is nou op VivA se Woordeboekportaal (in hul slimfoontoepassing) beskikbaar.

Hierdie woordeboek is ‘n opwindende projek waarin moderne Afrikaans op ‘n moderne manier opgeteken word.

Afgesien van die “gewone” inligting wat ‘n mens in ‘n woordeboek kan opspoor (soos betekenis, vertalings, woordsoortkategorie, fleksie en uitdrukkings waarin die woord gebruik word), is daar in AWEA skakels na podsendings, beeldmateriaal en ander ondersteunende inligting (soos VivA se Varsgebek-inskrywings) wat hierdie bron besonder ryk aan inligting maak.

Waar kry jy toegang tot die bron?

Net op VivA se Woordeboekportaal – AWEA is ‘n VivA-projek. Wanneer jy jou soekwoord intik, gaan die bron in die lysie verskyn soos enige ander bron waarin die soekwoord opgeteken is. Klik op die bron, en siedaar – jy het die inligting.

Hoe omvattend is die bron?

AWEA is ‘n lewende projek, met ander woorde daar word daagliks inskrywings bygevoeg. Dit is dus (nog) nie ‘n volledige, afgehandelde bron soos die HAT nie, dis ‘n woordeboek wat met ‘n paar inskrywings begin het en voortdurend uitbrei.

Wie kan deelneem aan die projek? Enige gebruiker van Afrikaans kan vir VivA woorde of sêgoed stuur en dit word vir opname oorweeg. Dien dit in op ons hul webblad by: https://viva-afrikaans.org/varsgebek/segoed.

Hoeveel kos toegang?

Niks! Dis een van VivA se eie produkte, en jy kan gratis daarop naslaan.

Nuuskierig om te sien hoe dit lyk? Tik enige van die volgende soekwoorde in:

linguistiek
frasenaam
organoïed
meerkat
morfologie
ontruim
stratum
seldsaam
donkie

Lekker naslaan!