Nathan Trantraal: Kaaps is sy taal

Enigeen wat wil weet hoe lyk en klink die Afrikaans wat op die Kaapse Vlakte gepraat word, kan gerus enigiets wat Nathan Trantraal skryf, lees. Hy het egter aanvanklik nie sy merk gemaak as skrywer of digter nie, maar wel as strokiesprentkunstenaar. Hy en sy broer André, bekend as die Trantraal-broers, het in 2003 ’n strokiesprent vir die Cape Argus geteken, Urban Tribe. In 2008 publiseer Tafelberg die broers se Stormkaap: Drome kom altyd andersom uit, as ’n grafiese roman en in 2010 die grafiese roman, Coloureds. Van die ander strippe waarvoor hulle verantwoordelik was, is Ruthie in Rapport en The Richenbaums in die Cape Times.

Nathan het grootgeword in Mitchell’s Plain waar hy geleer het om Kaaps te praat, maar na sy ouers se egskeiding, het hulle Bishop Lavis toe getrek. Dit het ’n bepaalde uitwerking op sy skryfwerk gehad. In een onderhoud sê Nathan, “As daa een ding is wat ek gelee et van opgroei in Bishop Lavis issit dié: daa is niks meer unimportant as die liewens van arm mense nie. As arm mense doodgan los hulle niks agte nie, niks trace dat hulle exist et ie. Vi my is my writing history as told by the losers.”

Al kom hy uit ’n familie wat baie graag lees, het hy eers in matriek die vreugde van boeke en lees ontdek. In Valhalla Park se biblioteek, is Nathan blootgestel aan die wêreld van letterkunde en dis veral die Nobelpryswenner DM Coetzee se werk wat ’n onvergeetlike indruk op hom gemaak het. Hy vertel dat wanneer hy teken, probeer hy om sy sketse te benader presies soos wat DM Coetzee sy skryfwerk benader.

Nathan se rubrieke, geskryf in Kaaps, verskyn gereeld in verskillende publikasies soos Rapport, Beeld en Netwerk 24. Hy is getroud met die bekroonde digter, Ronelda S Kamfer en sy het hom op ’n dag uitgedaag om sy hand aan gedigte te waag. Die resultaat was die debuutbundel, Chokers en survivors, waarvoor hy in 2015 met die Ingrid Jonker-prys vereer is. Hy het ook in 2014 ’n ATKV-mediaveertjie vir die bundel ontvang. Die bundel is uit alle oorde geloof vir die “sterk en pretensielose kommentaar wat dit lewer op die wanhopige sosiale milieu van die Kaapse Vlakte.” In sy gedigte beeld hy die eindelose stryd om oorlewing waarin hierdie mense altyd gewikkel is, grafies uit.

Nathan hou baie van sport, maar dis veral sokker waar sy groot belangstelling lê. Hy is dan ook ’n ywerige ondersteuner van Manchester United. Nathan, Ronelda en hul dogtertjie Seymour woon in Landsdowne in die Kaap.

Hoe lyk sy Afrikaans?

“My Afrikaans lyk soesie mense wat it praat. Die geskiedenis van Coloured mense is heeltemaal locked up innie Afrikaans wat hulle praat. Is Engels, Dutch, Malay, Indonesian Arabic, Khoe. Dis ’n version van Afrikaans wat unedited is, sône gatekeepers en sône affectations. Die problem is net die Afrikaans wat ôs op skool gedoen ’et, het net ’n passing resemblance gehad to die Afrikaans wat ôs byrie hys gepraat ’et. Dis soos twee mense van dieselle familie wat anderste praat. Nie twee mense van een familie is mos dieselle nie.”

Hoe leef hy in Afrikaans?

“Ek is Afrikaans grootgemaak, die groot meerderheid van my liewe het in Afrikaans gebeu. Omdat ek ’n skrywer is, en ek try om expression te gie an my experiences, is Afrikaans my tool, wan Afrikaans is al taal waarin ek heeltemal myself kan wies. It issie regtig ’n keuse wat ek maak ie. Ek hang nie enige ideologies an my taal ie en ek hou nie van anne mense wat it doen nie. Afrikaans is my taal, nie my liewe nie, maar dis al way wanne ek wil, om iets yt my liewe te deel.”

Ambassadeursprojekte:

Nathan en sy broer André is tans besig met ’n grafiese roman wat begin is deur die strippe wat in Rapport verskyn het. Die skep hiervan is ’n geweldige tydsame proses, maar die twee is vasberade om dit te voltooi. Die publiek se ondersteuning op enige manier, sal dit vir hulle makliker maak om dit wel te kan doen.

Maak gerus kontak:

Indien jy Nathan op enige manier wil ondersteun, stuur gerus ’n e-pos aan: ntrantraal15@gmail.com