Koos Marais: Hartstogtelik lief vir die natuur

Daar is oral ’n plek vir Afrikaans, glo Koos Marais

Koos Marais is ’n man met ’n wye belangstellingsveld. Hierdie Afrikaans.com Ambassadeur is ’n tandarts wat die leemte vir Afrikaanse opleiding vir tandheelkundiges raakgesien het. In die tydperk wat tandartse wel in Afrikaans opgelei is, is daar geskikte en ’n uitgebreide skat van Afrikaanse terme vir die professie ontwikkel en Koos wil hê dat dit nie in onbruik moet verval nie. In 2016 het hy ’n studiegroep vir Afrikaanse tandartse begin en hy bied gereeld kursusse aan waarmee tandheelkundiges hul punte verdien as deel van hul jaarlikse professionele opleiding. Koos se talente strek egter veel verder en in 2016 is sy boek Die Keiservoël Oor Namaland, deur Cordis Trust gepubliseer. 400 kopieë van hierdie boek, wat handel oor die onreg wat in die koloniale tydperk teenoor die Namas gepleeg is, is in November 2016 tydens ’n spesiale oorhandigingsgeleentheid in Maltahöhe aan die Nama-mense oorhandig.

Om meer oor die oorhandigingsgeleentheid van Die Keiservoël Oor Namaland te lees, klik op:
http://maroelamedia.co.za/afrikaans/boeke/die-keiservoel-oor-namaland-oorhandiging-van-die-boek-aan-namas/

Aangename kennis

Wanneer Koos Marais se vingers oor die rekenaar se toetsbord begin kletter soos reën op ’n sinkdak, of wanneer hy ’n mooi toneel op sy kamera se geheuekaart vaslê om met ander te deel, voel dit asof hy waarlik lewe. Koos praktiseer die afgelope 37 jaar as tandarts in Pretoria, maar dis bloot een van vele talente. Reeds as student het hy ekstra geld verdien met artikels en foto’s wat in die koerant Hoofstad gepubliseer is. Hy is ook die stigter en eerste redakteur van die jagtydskrif, SA Jagter. Koos, wat in 1973 aan die Hoërskool Menlopark gematrikuleer het, is ook ’n deeltydse akademikus wat vroeër jare aan die Universiteit van Pretoria en by Wits klas gegee het. Tans bied hy gereelde Afrikaanse opleidingsessies vir tandheelkundiges in Pretoria aan. Hy het God se Skepping hartstogtelik lief en droom nog van vele reise na die ongerepte natuur van ons buurlande. Koos en sy vrou Ingrid het ’n seun, dogter en skoondogter.

Hoe lyk sy Afrikaans?

As skrywer verkies Koos dit om skoon, suiwer en oorspronklike Afrikaans te gebruik in alles wat hy skryf. Hy kan nie SMS-taal skryf nie, want hy wil nie. Afrikaans, sê hy, het genoeg woorde.

Hoe leef hy in Afrikaans?

Koos hou daarvan om die Afrikaanse kunswêreld te ondersteun en woon jaarliks verskeie produksies by die Aardklop Kunstefees by. Hy is ook lid van die Vriende van Aardklop-organisasie. Hy koop en lees Afrikaanse boeke en koerante. Waar hy ook al gaan, praat hy Afrikaans, sonder om mense wat dit nie kan praat nie, te verneder.

Sy projek:

Koos se historiese roman, Die Keiservoël Oor Namaland, is in 2016 deur Cordis Trust gepubliseer. In hierdie lywige werk vertel hy die verhaal van die Nama- en Herero-vryheidsvegters van destyds wat geveg het teen die onderdrukking van die Duitse imperiale en koloniale heersers. Hy hoop dat die boek die kollig sal laat val op die belangrike bydrae wat die Namas van Namibië en die Khoi-Khoin tot die Afrikaanse taal gelewer het en dat dit hierdie mense sal trots maak op hul herkoms.

Maak gerus kontak:

Stuur ’n e-pos aan kosiemarais@gmail.com