
Verbeel jou vir ‘n oomblik ‘n boogskutter sonder ‘n teiken … Hy trek die pyl terug in sy boog, hy mik, en hy skiet die pyl. Het hy raakgeskiet? Kan jy sê? Sonder ‘n teiken sal ons nooit weet of hy raakgeskiet het nie. Ons kan ook nie sien hoe ver hy gemis het nie, waaruit hy kan leer of hoe hy kan verbeter nie. ‘n Boogskutter sonder ‘n teiken is nutteloos. Dit is dieselfde met jou lewe en finansiële sukses. Jy benodig mikpunte om verstellings te kan maak, jou vordering te kan meet, en uiteindelik te bepaal of jy sukses behaal of nie.
Doelwitte is die geheime bestanddeel in die resep vir sukses. Hoekom? Oor dit wat doelwitte jou gee …
Rigting.
Mense sonder doelwitte is wisselvallig. Ken jy iemand wat elke keer besig is met iets anders as jy hulle sien by ‘n braai? Een dag boer hulle, dan stig hulle ‘n besigheid, dan studeer hulle. Wanneer ‘n mens regs, links, vorentoe en dan agtertoe beweeg, bly jy eintlik op dieselfde plek. Bepaal dus waarheen jy wil gaan en maak doelgerig besluite om in daardie rigting te beweeg.
Verantwoordelikheid.
Iemand sonder ‘n doelwit het geen verantwoordelikheid teenoor homself nie. Daar is niks wat hom of haar aanspreeklik hou om aksie te neem en die daad by die woord te voeg nie. As jy ‘n doelwit het, hou daardie doelwit jou aanspreeklik vir wat jy op ‘n daaglikse basis doen. “Ek kan nie vandag net op die bank lê nie, want ek moet werk om daardie strandhuis te kan bekostig.” “Ek kan nie vroeg gaan slaap nie, want ek moet nog daardie laaste twee ure insit om nader aan daardie strandhuis te kom.” “Ek kan nie my geld nou op ‘n ete spandeer nie, want ek spaar vir daardie strandhuis.”

Motivering.
Die gesegde lui: “Mense met meer goed om te doen, kry meer gedoen.” As jy doelwitte het, motiveer dit jou op ‘n daaglikse basis om aksie te neem. Mense met doelwitte is meer gemotiveerd, en het nie tyd om te mors nie, omdat hulle konstant hulle doelwitte najaag.
Dit hierbo is alles goed en wel … Maar, waar begin ‘n mens? Hier is praktiese stappe van hoe ek my doelwitte opstel:
- Stap 1: Kies jou doelwitte. Stel vir jouself doelwitte in verskillende kategorieë, bv. persoonlike ontwikkeling, gesondheid, verhoudings en finansies. Dit is belangrik om verkillende doelwitte in verskillende areas van jou lewe te hê sodat jy altyd “wen”. As dit sleg gaan in een gebied, bereik jy dalk jou doelwitte in ‘n ander.
- Stap 2: Koppel ‘n tyd aan jou doelwitte. Ek het vyf-jaar doelwitte wat ek dan opdeel in jaarlikse doelwitte. Dit word dan opgedeel in maandelikse en weeklikse doelwitte met daaglikse doenlysies. Deur ‘n tyd aan elkeen van jou doelwitte te koppel, skep jy dringendheid om hulle te verwesenlik.
- Stap 3: Koppel ‘n prys aan jou doelwitte. Elke doelwit het ‘n prys, hetsy in die vorm van geld of tyd. Hoeveel gaan die strandhuis of daardie mooi kar jou kos? Hoeveel gaan daardie familievakansie of wêreldtoer jou kos? Hoeveel passiewe inkomste moet jy verdien sodat jy jou werk kan afskaal om meer tyd saam met jou familie of jou eie persoonlike ontwikkeling te kan spandeer? Sodra jy ‘n koste aan jou drome koppel, sal jy onmiddellik anders begin dink oor finansies.
- Stap 4: Maak dit visueel. Deur gebruik te maak van prente, foto’s, plakkate, ens. kan ’n mens konstant jou doelwit voor oë hou. Skep herinneringe daarvan op jou foon en rekenaar … en plak dit selfs teen jou spieël! So begin jou doelwit vir jou ‘n realiteit word.
Sonder ‘n teiken sal jy nooit kan raakskiet nie, jy sal ook nooit jouself kan meet of verbeter nie. Jou finansiële sukses begin by jou eerste doelwit.
Wat is daardie doelwit vir jou?
Artikel deur: Albert van Wyk
Albert van Wyk is ’n eiendomsbelegger, besigheidseienaar en spreker. Hy is ook die skrywer van die boek Millionaire at 22. Hy is passievol daaroor om mense toe te rus om finansieel onafhanklik te raak en is opgewonde om dit ook in Afrikaans te kan doen. Hierdie inhoud vorm deel van ons eksklusiewe reeks Finansies 101 met Albert van Wyk en sal in sewe dele beskikbaar gestel word. Hou ons webblad en sosialemediablaaie dop vir die volgende episode!

Albert gesels ook gereeld op PretoriaFM waar hy finansiële en besigheidsvrae beantwoord. Hierdie onderhoude is ook gratis op sy Spotify-rekening beskikbaar.

As eiendomsbelegger, en entrepreneur oor die algemeen, is Albert glad nie bang om sy hande vuil te maak nie.

Albert is ‘n gewilde en passievolle spreker en afrigter.





