Hoe-nou-bannier
Hoe Nou?! met Gerhard van Huyssteen (“die professor”) en Su-an Müller-Marais (“die prikkelpop”) is ’n podsendingsreeks wat die oorsprong van allerhande Afrikaanse verskynsels en gebruike ondersoek en verduidelik. Primêr vervaardig vir radio, word Hoe Nou?! ook hier gehuisves omdat dit as heerlike klaskamerhulpbron kan dien, hetsy vir luistertoetse of net lekker luister.

Elke episode kan direk vanaf Afrikaans.com gestroom word. Dit kan ook afgelaai word vir gebruik sonder data of Wi-Fi deur op die aflaaiknoppie by elke klankgreep te klik. As addisionele hulpbron vir die klaskamer, stel ons ook ’n verwerking van die radioteks, sowel as sommige van die bronne wat geraadpleeg is, beskikbaar. Hoe Nou?! word trots aangebied in samewerking met Maroela Media.

Episode 1

Het jy geweet die Engelse het “hold thumbs” direk uit Afrikaans geleen en nie andersom nie? Al ooit gewonder waarom duim vashou ʼn simbool vir voorspoed is? Su-an en Gerhard gesels oor die verskille en ooreenkomste tussen “duim vashou”, “hold thumbs” en “cross your fingers”.

Episode 2

Toffie (ook bekend as tameletjie) is ʼn lekkerny wat bekend is in elke Suid-Afrikaanse huis. Maar wanneer het mense vir die eerste keer toffies begin maak? Su-an en Gerhard gesels oor die herkoms van toffie en wat die verskil is tussen toffie en tameletjie. Bring jou koffie, gryp ʼn toffie, en kom kou saam aan dié tameletjie.

Episode 3

Ons almal ken toffies, maar dié arme lekkerny het iewers in die geskiedenis ʼn negatiewe konnotasie gekry. Sommige mense dink die sogenaamde toffieteken is erg aanstootlik, terwyl ander dit heel neutraal en onskuldig vind. Su-an en Gerhard speur die oorsprong van die handgebaar na en ondersoek die verskillende wyses waarop Afrikaanssprekendes die teken en verbandhoudende uitdrukkings gebruik/misbruik.

Episode 4

Al ooit gewonder waar kom die name “herfs” en “lente” vandaan? Dink jy dit het dieselfde herkoms as “autumn” en “spring”? Kom vind uit wat seisoenname met die kerk en wyn te make het, en raak saam met Gerhard en Su-an nostalgies oor die belangrike rol van seisoensveranderinge.