fbpx

Gratis stories vir jong kinders

Hoe praat ek oor siekte met my kleinding?

Om siek te word of hospitaal toe te gaan, is nooit ’n aangename ervaring vir jou kind nie.

Voor jy jou oë uitvee, sit jy met jou hande in jou hare want die vrae uit jou kleinding se mond hoop op! Hoe beantwoord jy as ouer daardie vrae op ’n manier wat hulle verstaan?

Speelterapeut Wietske Boon het Hospitaalstories vir jong kinders begin skryf met die oog daarop om kinders voor te berei op mediese prosedures en sodoende trauma te voorkom. Veral met die uitbreek van die koronavirus en die staat van inperking, word die vrae al hoe meer en is dit belangriker as ooit om  die jongspan in te lig oor die siekte en die maatreëls wat in plek moet wees om dit te voorkom.

Laai hier gratis stories af, trek die jongspan nader en begin gesels oor hierdie onderwerp. Die virus in die woud 1 en 2 fokus spesifiek op die koronavirus terwyl die res van die verhale kyk na ander siektes waarmee jou kind dalk gekonfronteer kan word.

HOSPITAALSTORIES VIR JONG KINDERS

deur Wietske Boon

Die woud is koel. Die varings, palms en gras groei ruig onder die skaduwee van groot bome. Die verskillende diere wat hier woon vorm ’n hegte gemeenskap. Hulle help mekaar waar hul kan, want hul weet dat as hulle saam werk, almal gelukkiger gaan wees. Dr. Uil is die mees gesiene dier in hierdie gemeenskap. Hy is immers ’n dokter en ’n wyse ou man. Selfs Dr. Uil het hulp van die ander diere nodig. Skiri Eekhoring, Mou Meerkat en Connie Haas is gesoute helpers wanneer iemand siek word.

Wanneer ’n boodskap vinnig oorgedra moet word, is Naaldekoker die ou om te vra. Hy vlieg gemaklik oor die plante en, omdat hy so hoog is, kan hy vinnig iemand opspoor. Vir die boodskappe vanuit al die hoeke van die groot woud word Pippi Posmeester ingespan. Hy kan vinnig vlieg en enige briewe maak hy om sy been vas.

Die woud is selde stil. Lucia Nagtegaal se pragtige sang waai deur die blare. Die dierekinders se fyn lagstemmetjies bring vreugde onder die blare en in die gras. Dít is nou as Juffrou Muis hulle nie leer van die verskillende blare, grassoorte en van veiligheid nie.

Alhoewel die diere in die woud meestal gelukkig is, is daar dae wat die diere, net soos mense, siek word. Soms vind gebeure plaas wat buite die diere se beheer is. Ander kere is hul bang, benoud of sommer net moedeloos!

Hier is ’n paar sulke gevalle…

Wie is Wietske Boon?

Wietske is ’n geregistreerde berader by die Raad vir Beraders in Suid Afrika en spesialiseer in die gebruik van spelterapie-tegnieke. In privaatpraktyk werk sy met kinders tussen die ouderdom van twee tot vyftien jaar. Sy is ’n bestuurslid van die Vereniging vir Voorskoolse Opvoeding en Sorg (VVOS) en gee ondersteuning aan kleuterskole en kleuteronderwysers in die veld van vroeë kinderontwikkeling. Besoek gerus haar webtuiste by www.childtherapist.co.za.

*Hierdie stories is die intellektuele eiendom van Wietske Boon en is met spesiale vergunning op Afrikaans.com se webtuiste geplaas. Hierdie stories mag nie verkoop, gedupliseer of as jou eie versprei word nie.

064 652 6873

JOU Afrikaans tel oral en altyd. Vertel ons met die hutsmerk #jouafrikaanstel waar, wanneer of waarom jou Afrikaans tel. Met ons nuutste veldtog bevestig ons dat jy nooit jou taal hoef prys te gee nie, dat Afrikaans oor globale grense strek en dat ons die verskeidenheid in Afrikaans vier. Kyk hier na die veldtog-video’s en neem deel. Onthou om jou naam, van en van watter geweste jy is, by te voeg.