Finansies 101: Boer jy vooruit of agteruit met jou finansies?

Soms is dit skrikwekkend om te kyk na jou finansies en veral dit wat binne jou skuld- en beleggingsrekeninge aangaan … Die grootste fout wat mense maak, is om dan hul finansies eerder te wil vermy. ‘’Ek is in soveel moeilikheid … om die balans van die rekening te sien, maak my net meer negatief!’.

Het jy al ooit so gevoel? Dit is dan baie belangrik om juis te fokus op jou finansies sodat jy dit kan regstel.

In hierdie episode van Finansies 101 met Albert van Wyk bespreek ons die volgende:

• Hoe om ’n objektiewe beeld van jou huidige finansiële situasie te verkry.
• Die formule om te bepaal watter opsies vanuit moontlike beleggings die beste keuse is.

Die eerste stap vorentoe, is een stappie terug … Tree terug om jou finansies uit ‘n breër en meer objektiewe hoek te besigtig deur van hierdie vyf stappe gebruik te maak:

1. Skep ‘n Excel-spreitabel of gebruik sommer lyntjiespapier en skep vyf kolomme, naamlik: datum, inkomste, uitgawe, kategorie en balans. Jy kan ook hier klik om ’n reeds bestaande templaat af te laai.
2. Sleutel al jou inkomstes vir die laaste drie maande op die spreitabel in en dui aan in watter kategorie dit pas. Dit kan byvoorbeeld salarisse, kommissie, winste, verkope, ens. wees.
3. Sleutel al jou uitgawes oor die laaste drie maande op die spreitabel in en dui aan in watter kategorie dit pas. Jy kan byvoorbeeld spandering op klere, kos, vervoer, vermaak en so meer hierby insluit.
4. Aan die onderkant van die spreitabel, tel al die inkomstes en uitgawes bymekaar en kyk wat is jou nettobedrag. So kan jy sien of jy vorentoe of agteruit boer. Die Afrikaans.com-templaat wat jy hierbo kan aflaai, sal dit outomaties vir jou bereken.
5. Die laaste stap is om een vir een na elke inkomste te kyk en te dink oor hoe jy dit kan vermeerder. Terselfdertyd moet jy elke uitgawe oorweeg om te bepaal waar dit verminder of heeltemal uitgesny kan word.

Welgedaan, jy het nou ’n objektiewe en duidelike idee op skrif van hoe jou finansies lyk! Dit stel jou in staat om strategies te werk en effektiewe besluite te neem om jou inkomstes te vergroot en uitgawes te beperk … Nou is die vraag of jou geld regtig vir jou werk. Kom ons kyk!

• Hoe weet jy of jou beleggingsfonds, spaarrekening, eiendomsbelegging, of selfs jou besigheid, ’n goeie opbrengs lewer?
• Hoe besluit jy in watter besigheidsgeleentheid om te belê?
• Het jy al gewonder of jy die regte besluite maak en of jou geld regtig vír eerder as téén jou werk?

Beleggers en sakemanne gebruik ’n formule vir die opbrengs van ’n belegging om hierdie besluite te kan neem. Dit is maklik om te gebruik en jy kan dit ook doen. Die formule neem jou netto inkomste (totale inkomste minus totale uitgawes) vir die jaar en deel dit deur die hoeveelheid wat jy belê het. Sodoende kry jy ’n persentasie wat jy kan vergelyk met ander beleggings. Die formule lyk so:

Hier is ’n praktiese voorbeeld:

Jou eiendom bring maandeliks R19 000 aan huurinkomste in. Water en ligte kos R2 600 per maand. Die internet en sekuriteit kos R1 200 per maand. Die tuinwerker en huishulp kos R2 200 per maand. Jou maandelikse instandhoudingskoste beloop R1 500. Die huis het R1 300 000 gekos met alle verbeterings ingesluit.

Hierdie persentasie kan nou vergelyk word met die opbrengs wat jy sou kry met jou beleggingsfonds, spaarrekening of besigheid. Deur presies te weet hoe jou finansies lyk, kan jy beter besluite neem om jou finansiële welstand momentum te gee.

Volgende keer kyk ons na die belangrikheid om jouself eerste te betaal … bly ingeskakel!

Laai die inkomste-uitgawe-templaat af, klik hier.