Vrystaat- / Mpumalanga-kuier

‘Afrikaans – van vrees tot liefde’

Rosendal – Die Oos-Vrystaat is ‘n plek vol stemme. Dié van nou-mense, lankgelede-mense, kranse, grotmure vol kuns en beeste wat geheime het. Die nedersetting Rosendal se strate lê wyd en ontspanne. ‘n Plek waar kreatiewe stadsmense na heen ontvlug en hul hekkies op knip moet hou of die beeste kom wei in hul tuin. Afrikaans hier is slim, filosofiese gesprekke op stoepe. En towerwoorde van ‘n vars vryheid wat luidkeels en oop-oog teen oorhangende kranse en grotmure, soos Indiaanse rookseine, ‘n nuwe boodskap oor ons land uitbasuin. “Verban vrees. Omhels die liefde. Jy mag maar Afrikaans wees.”

Gewortel in ‘n taal – Nelspruit

Of sy baklei teen die onwettige stroping van renosterhorings of sy gesels oor hoe belangrik dit is vir Afrikaanssprekende gesinne se kinders om nie van ‘n Afrikaanse opvoeding ontneem te word nie, befaamde skrywer Elize Parker, praat met passie. “As jy nie wil hê jou kind moet net ‘n rankplantjie wees nie, maar stewig gewortel in ‘n eie identiteit, maak seker hulle is in die beste moontlike Afrikaanse skool met ‘n Afrikaanse onderwyser wat werklik die taal lief het. Jy gee vir jou kind ‘n skat wat vir hulle gaan deure oopmaak!”

As outeur van 26 boeke, is Elize geliefd onder haar lesers en een van ‘n handjie vol inspirasiefiksie-skrywers in Afrikaans. Sy is al meer as 30 jaar lank in die joernalistiek en beywer haar tans as spesialisverslaggewer in bewaring by Die Laevelder in Nelspruit.

Afrikaans my doentaal’ – Kaapsehoop/Kaapschehoop

Op pad met Afrikaans: Die geskiedkundige myndorpie, Kaapsehoop/Kaapschehoop wat eens ook as Duiwelskantoor bekend was, is die plek waar goud in 1882 ontdek is. Dié pragtige klein plekkie is 1712 meter bo seespieël en het net ‘n handjie vol strate en histories bewaarde huisies waar wildeperde sommer in tuine wei. Kaapsehoop is dikwels toe onder digte mis en is ‘n plek waar spookjagters glo van tyd tot tyd aandoen aangesien aardige stories hier vertel word van ou myners wat steeds nie hul soeke na goud kan laat vaar nie. Die ontdekking dat Kaapsehoop oorwegend Afrikaans is (51.1%), is ‘n aangename verrassing en hier is oral borde met heerlike name op wat dit te kenne gee – Koek ‘n Pan, die Paalhys, die Ou Plaashuis, Kos en Katel, asook die Perdekroeg (‘n buitebad met water). Dit is ‘n plek wat graag deur jong kunstenaarskrywer, Tjaart van der Walt (30),van Waterval Boven, besoek word wanneer hy inspirasie soek.