Kersfeeskos

Dis weer die tyd van die jaar wanneer almal vinnig na heerlike resepte begin soek wat die gaste om die Kerstafel sal verras en bekoor. Afrikaans.com deel maklike en smaaklike resepte van ons ambassadeurs.

Vickie de Beer, ʼn vryskut kosstilis en kosskrywer is ook die kosredakteur van Rooi Rose. Vickie se kosboek, My Low Carb-kombuis bevat meer as 50 watertandresepte en ook heelwat wenke hoe om na ʼn laekoolhidraatdieet oor te skakel.

Vickie sê haar idee vir ʼn heerlike Kersmaal is ʼn lang tafel met baie familie daarom geskaar. “Ons is geseënd om al ons mense by ons te hê,” sê Vickie. “Ek hou daarvan om die kos spesiaal te maak, maar nie te opgesmuk nie. Die samesyn is die hoogtepunt en dit is ook besonder lekker om almal te bederf met kos wat ons nie elke dag eet nie.”

Volgens Vickie moet ons baie meer Suid-Afrikaans dink wanneer ons die Kersmaal beplan. “Baie van die tradisionele geregte is vir warmer klimate bedoel. Dit voel nie vir my reg om in die warm sonskynklimaat “kookkos” te eet nie en ons begin graag die Kersmaal met ʼn voorgereg soos die sitrus- en garnaalslaai of gesnyde spanspek met parma-ham. Met ons heerlike klimaat kan ʼn mens ook as hoofmaal iets interessant oor die kole gaarmaak.”

Heleen Meyer is ʼn onafhanklike koskonsultant wat weekliks smaaklike en gesonde kosblikidees op kykNET se Groot Ontbyt deel. In Heleen se derde kosboek, Maak Vyf, ʼn kookboek wat deur Human & Rousseau uitgegee is, deel sy groener en gesonder resepte. Vir Heleen is die ideale Kersmaal eenvoudige, maar geurige kos. “Vir my hoef dit nie opgesmuk of ingewikkeld te wees om dit lekker en spesiaal te maak nie. Geen kok wil daardie dag heeldag in die kombuis deurbring nie en die resepte wat ek hier deel, Marokkaanse vis en seekoskebabs en die wortelslaai met roomkaasballetjies kan vooraf gemaak word of regtig vinnig en maklik voorgesit word,” sê sy.

Heleen glo ook dat ons inheems moet dink wanneer ons die spyskaart vir die Kersmaal beplan. “Ons het wonderlike seisoenale bestanddele om vir ons feesetes te gebruik en dit maak nie vir my sin om iets te eet wat eintlik in die wintermaande hoort wanneer ons in die middel van Desember en Januarie is nie. Om iets oor die kole gaar te maak en heerlike slaaie en ligter kos deel van die spyskaart te maak, is na my mening, die heel lekkerste vir ʼn Somerkersfees.”

Annelien Pienaar, nog een van ons Afrikaanse ambassadeurs, het ʼn paar jaar gelede begin om haar resepte op ʼn kosblog te deel: Boerekos met ʼn Twist. Die besoekers wat na hierdie blad gestroom het, het haar gou oortuig dat die mense honger is vir ʼn resepteboek met heerlike Afrikaanse geregte daarin en Boerekos met ʼn Twist het in 2017 by NB Uitgewers verskyn.

Annelien geniet dit geweldig baie om haar mense met smaaklike kos te bederf. “Wat is dan nou lekkerder as om langs ʼn mooi gedekte tafel te sit saam met jou hartsmense en te smul aan lekker kos wat jy self, met hulle hulp, gemaak het. My liefde vir kosmaak kom juis van my ma en ouma af en dis ook by hulle wat ek geleer het hoe om jou liefde deur middel van heerlike kos uit te deel,” sê sy.

Annelien deel die resep vir ʼn baie besonderse melktert wat ʼn perfekte manier is om die Kersmaal mee af te sluit.

Mag jy en jou geliefdes heerlik saamkuier en eet!

Voorgereg:

Vickie de Beer se heerlike Sitrus- en garnaalslaai (6 – 8 porsies) (Die resep het voorheen in Rooi Rose verskyn)

  • 8 – 12 garnale, skoongemaak en liggies gestoom
  • 1 lemoen, geskil en in segmente gesny
  • 1 suurlemoen, geskil en in segmente gesny
  • 1 pomelo, geskil en in segmente gesny
  • ʼn handvol jong kruie en slaaiblare
  • 80 ml grondboontjies, ruweg gekap
  • 125 ml vars koljanderblare, ruweg gekap.

Slaaisous

Meng 80 ml olyfolie, 30 ml witwynasyn, 5 ml Dijon-mosterd en 5 ml heuning en geur met sout.

Metode:

Meng al die bestanddele. Verdeel in klein bakkies.

Hoofgereg:

Marokkaanse vis-&-seekoskebabs

Uit: Kos is op die tafel

Lewer 6 tot 7 porsies

’n Maklike, maar indrukwekkende resep om gaste mee te bederf. Die saffraan is ’n belangrike bestanddeel en die perfekte smaak saam met vars vis en seekos.

Marinade (voldoende vir 1-1,5 kg vis en/of seekos)

2 middelslag uie, fyn gekap

4 – 5 knoffelhuisies, fyn gedruk

5 ml gemaalde komyn

5 ml paprika

2,5 ml cayenne-peper

2,5 ml (0,5 g) saffraan

125 ml (½ k) gekapte vars koljanderblare

100 ml gekapte vars Italiaanse pietersielie

125 ml (½ k) olyf- of avokado-olie

60 ml (¼ k) vars suurlemoensap

15 ml (1 e) fyngerasperde suurlemoenskil

15 – 20 ml growwe sout

varsgemaalde swartpeper na smaak

Vis & seekos

750 g vars ferm lynvis, bv. koningklip, geelstert of dorado, in groterige blokkies gesny

200 g rou garnale, ontdooi, skoongemaak en drooggedruk

450 g rou mossels, ontdooi, skoongemaak en drooggedruk

30 – 45 ml (2 – 3 e) olyf- of avokado-olie vir panbraai

12 – 14 hout-kebabstokkies

  1. Marinade: Meng al die bestanddele saam in ’n mengbak. Plaas die vis en seekos in ’n enkellaag in ’n groot, vlak glasbak. Skep marinade bo-op en meng versigtig deur. Bedek en marineer ten minte 3 – 4 ure of oornag in die yskas.
  2. Ryg vis en seekos om die beurt op kebabstokkies. (Week stokkies eers 10 minute in water, indien dit oor die kole gerooster gaan word – dit keer dat die stokkies brand.)
  3. Plaas die kebabs in ’n toeknyprooster en rooster 5 – 7 minute aan elke kant oor matige kole of tot die vis en seekos net gaar is. Draai die kebabs gereeld om.
  4. As alternatief, kan die helfte van die olie oor matige hitte in ’n groot braaipan verhit word.
  5. Braai die helfte van die kebabs 5 minute lank aan elke kant of tot net gaar. Hou warm en herhaal met orige kebabs en olie.
  6. Indien verkies kan die orige marinade verhit en soos ’n sous saam met die kebabs voorgesit word. Sit voor op bruinrys of koeskoes met ’n groen slaai.

Wenke

  1. Bevrore vis sal nie dieselfde resultate lewer nie.
  2. Sny die visblokkies sodat dit min of meer so groot soos die seekos is. Dit verseker dat alles eweredig gaar word. Ryg die seekos só, dat soveel as moontlik daarvan aan die pan sal raak, wanneer dit gebraai word. Garnale kan bv. in ’n halfmaan-vorm, deur die kop en stert, geryg word, sodat dit ‘plat’ lê.

3. Hierdie is ’n redelike droë marinade en kan vir ’n heel stuk vis of visfilet gebruik word. Die marinade is ook heerlik met hoender-, vark- of lamsvleis

Bykos:

Basiliekruid-&-tamatieslaai

Uit Maak vyf/Make five

Lewer 4 porsies

Sonryp-tamaties en basiliekruidblare sorg vir ’n ongeëwenaarde kombinasie. Dis perfek vir slaai, toebroodjies én braaibroodjies.

250 g verskillende soorte klein tamaties, soos kersie-, rosa- of geel tamaties

3 groot, ryp tamaties, in dun skyfies of wiggies gesny

30 ml (2 e) basiliekruidpesto

’n handvol vars basiliekruidblare

sout en peper

100 g ricotta-, bokmelk- of mozzarellakaas

Metode:

  1. Halveer enige klein tamaties wat te groot is vir jou vurk. Rangskik dit op ’n slaaibord saam met die tamatieskyfies.
  2.  Giet die pesto oor die slaai net voor dit bedien word. Garneer met basiliekruidblare. Sit voor met ’n knippie growwe sout, swartpeper en ’n lepelvol ricottakaas of gekrummelde bokmelkkaas of skywe mozzarellakaas

Bykos:

Krakerige wortelslaai met kruie-en saad-roomkaasballetjies  (Die resep het voorheen in Rooi Rose verskyn)

Genoeg vir 6

Gepiekelde babawortellinte

  • 1 k (250 ml) witwynasyn
  • 1 k (295 g) suiker
  • 4 k (1 liter) water
  • 1 t (5 ml) komynsaad
  • 1 t (5 ml) peperkorrels
  • 1 t (5 ml) koljandersaad
  • 10 – 12 gekleurde babawortels, in linte gesny

 Geroosterde worteltjies

  • 1 pakkie gekleurde babawortels
  • 30 ml (2 e) olyfolie
  • 2 t (10 ml) komynsaad

Kaasballetjies

  • 1 houertjie (250 g) roomkaas
  • ¼ k (60 ml) wit en swart sesamsade
  • ’n hand vol gekapte kruisementblare

Verhit die witwynasyn, suiker, water, komyn- en koljandersaad en swartpeperkorrels in ’n middelslagkastrol oor matige hitte. Laat die mengsel vir 2 – 3 min kook en haal van die hitte af. Hou eenkant. Sit die wortellinte in die piekels.

Verhit die oond tot 200 ˚C. Sit die babawortels op ’n bakplaat en bedruip liggies met olyfolie. Strooi komynsaad oor en rooster vir 20 min. of tot sag maar nie pap nie. Haal uit en laat afkoel tot kamertemperatuur.

Rol die roomkaas in balletjies omtrent so groot soos ’n R2-munstuk. Rol die helfte van die balletjies in die sesamsaadjies en die ander helfte in die gekapte kruisementblare.

Sit die geroosterde wortels, gepiekelde linte en roomkaasballetjies op ’n mooi opdienbord en sprinkel ’n bietjie balsemiekasyn net voor opdiening oor.

Nagereg:

Annelien Pienaar se Melktert met ʼn Crème Caramel-vulsel (12 porsies)

  • 4 jumbo-eiers, geskei
  • ¼ t kremetart om eierwitte mee styf te klits
  • 200 g wit suiker
  • 125 g botter
  • 70 g koekmeel, gesif
  • 50 g mielieblom, gesif (Maizena)
  • knippie sout
  • 400 ml volroommelk
  • 100 ml room

Voorverhit die oond na 150 ℃. Smeer ʼn ronde koekpan van 25 cm deursnit en plaas eenkant. Kry ʼn oondpan waarin die koekpan gemaklik sal pas.

Smelt botter en hou eenkant om af te koel. Verhit melk en room in mikrogolf vir 2 minute en laat afkoel.

Klits eiergele en suiker saam vir 3 minute en klits die botter in ʼn dun straaltjie by.

Sif die koekmeel, mielieblom en sout saam en meng goed met die eiermengsel, voeg die melk by en vou in.

Klits die eierwit met kremetart tot stywepunt-stadium, vou in beslag. Die beslag is baie loperig en die eierwitte half skuimend bo-op. Moenie te veel meng nie. Sodra die streperigheid verdwyn, giet dan in gesmeerde pan.

Kook ʼn ketel met water en giet die kokende water in die oondpan. Plaas die koekpan met beslag in die oondpan en bak vir 60 tot 90 minute by 150 ℃.

Sodra die koek gaar is, verwyder uit die waterbad en laat goed afkoel by kamertemperatuur. Plaas vir ten minste vier ure of oornag in yskas om ferm te word. Plaas die koekbord bo-op die pan en keer die tert uit. Versier met kaneel en geniet.