Wes-Kaap-kuier

Kaapse kuier

Saam die toekoms in – !Khwa ttu San Kultuur- en Opleidingsentrum: Yzerfontein-distrik

Castro Maliti van Platfontein buite Kimberley is een van die San jongmense van regoor Suidelike Afrika wat opleiding by !Khwa ttu Kultuur- en Opleidingsentrum aan die Weskus (naby Yzerfontein) ontvang.
Met ‘n glimlag so breed en oop soos die landskap waarin sy oervoorsate agter die eland aangetrek het, vertel hy innemend oor hoe Afrikaans hom help om met die buitewêreld te kommunikeer al is hy bewus van die belangrikheid dat sy eie taal ook oorleef. “My Boesmantaal is soos die eerste broer van my en Afrikaans is onse klein sustertjie. Ek wil nie hê die wind moet hierdie twee wegwaai nie.”

‘As jy kon sien wat ek hoor’ – Gesiggestremde tieners gesels oor hul liefde vir Afrikaans: Pionierskool – Worcester

Ying Shan is deel van ‘n nuwe geslag jong mense in Suid-Afrika van Oosterse herkoms, maar reeds vlot Afrikaans praat, dink en droom. ”Afrikaans is vir my so mooi”, sê sy. “My gunstelng woord is kremetart, want dit klink sag soos water.” Sy en haar vriendekring klets passievol oor hoe Afrikaans hul lewe kleur gee.

‘Afrikaans is vir my ‘n omgee-taal’ – Muhammad Choglay: Bothasig

Afrikaans het ‘n ryk geskiedenis waartoe baie tale en kulture bygedra het. In Bothasig, ‘n Kaapse voorstad, vertel apteker Muhammad Choglay watter rol Afrikaans in sy uitgebreide familie se lewe as Moslems van Indiese herkoms speel, en hoekom hy dit steeds daagliks praat.

Francois du Toit, ‘n nasaat van Totius, gesels oor sy navorsing oor die eerste Afrikaans: Dal Josafat

Hurkend by ‘n slawegraf op Augusta Kleinbosch Gasteplaas waar sy naamgenoot in 1687 reeds begin boer het, gesels Francois oor die ontstaan van Afrikaans, die moed van die oortuiging wat dit die jong stigterslede van die Genootskap van Regte Afrikaners gekos het om standpunt vir hul nuwe taal in te neem, die eerste Afrikaanse publikasies en hoe die Bo-Kaapse aksent regtig tot stand gekom het.

Luister verder … 

Luister verder hoe gesels Francois du Toit oor sy navorsing oor die ontstaan van Afrikaans.

‘So sal ek jou liefhê’ – Desi van Wyk: Gordonsbaai

‘So sal ek jou liefhê, weer en weer en weer.’ Liedjieskrywer, Desi van Wyk van Gordonsbaai, se son-op-water-stem dra die vaste oortuiging van ‘n Afrikaans waarin ‘n mens vreesloos en met oorgawe kan liefhê.