ATKV-Spelathon 2018 – ‘n Zoeloe-meisie maak toe skoonskip in Afrikaans!

Party van ons sukkel maar om behoorlik te spel, maar die ATKV-Spelathon-deelnemers het dit duidelik onder die knie en vir hulle is spelling sommer kinderspeletjies.

Leerders van regoor die land het op 12 en 13 Oktober hul taalvernuf by vanjaar se ATKV-Spelathonfinaal by die H.B. Thom-teater in Stellenbosch ten toon gestel. Een ding was duidelik: Spel kan hulle spel!

Is dit nou breuk of breek, akkommodasie of akkomodasie, gebaseer of gebasseer, flink of vlink, en waar kom die deelteken nou weer – die eerste of die tweede “e” – of is daar ooit ’n tweede “e”! Dis sowaar nie maklik nie! En deesdae lyk dit asof mense al hoe swakker spel. Dalk het tekstaal iets daarmee te make? Die ywerige selfoongebruikers gebruik graag verkorte woorde en sal sommer maklik –tjie verander na -k (biki vir bietjie). Of dalk klank kleuters net nie meer nie. Hoe dit ook al sy, Afrikaanse spelling kan party van ons laat les opsê.

… want slimkoppe kan spel!

Die 15-jarige Nolwazi Mahlangu van Hoërskool Patriot (Mpumalanga), ‘n Graad-10 Zoeloe-spreker loop toe weg met die eerste plek in die ATKV-Spelathon se afdeling eerste addisionele taal vir Graad 10 tot 12-leerders. Afrikaans is haar vierde taal! Sy sê dit bewys net weer dat jy deur harde werk bo jou omstandighede kan uitstyg. Lees die lekker onderhoud met haar op Netwerk24 hier.

Foto verskaf.

Die kompetisie groei

Dit is ook die eerste jaar waar senior leerders (graad 10 tot graad 12) ook aan die ATKV-Spelathon deelgeneem het.

“Dit is ongelooflik om te sien hoe hierdie kompetisie se gehalte elke jaar verbeter,” sê Minette Mentz, hoofbeoordelaar van die ATKV-Spelathon.

“Hierdie leerders is fenomenaal en ons monde het telkemale oopgehang vir die moeilike woorde wat hulle reg kon spel.”

Dit sluit in woorde wat selfs volwassenes sal laat kopkrap, soos: biochemikus, kaas-en-wyngeselligheid, haakwurmbesmetting en tipe A-persoonlikheid.

“Daar was so ’n groot aanvraag van kinders wat vorige jare deelgeneem het en weer wou deelneem dat ons besluit het om hulle ook in te sluit,” sê Minette.

Volgens René Zietsman, projekorganiseerder, is die doel van hierdie projek om spelvaardighede te verbeter, innoverende onderrigmetodes te bied en gesonde kompetisie aan te moedig.

“Dit is kompetisies soos hierdie wat nie net ’n kardinale bydrae tot spelling lewer nie, maar dit ook vir leerders lekker maak om te spel,” sê sy.

Die kategorieë sluit in: graad 6 en graad 7 (huistaal en eerste addisionele taal), graad 8 en graad 9 (huistaal en eerste addisionele taal), en graad 10 tot graad 12 (huistaal en eerste addisionele taal).

Baie geluk aan al die wenners:

Graad 6 en graad 7, eerste addisionele taal

1ste plek: Gia Reynolds van Bryneven Primary School (Gauteng)

2de plek: Unam Hewu van Laerskool Danie Malan (Gauteng)

3de plek: Tyler Schagen van Laerskool Gene Louw (Wes-Kaap)

Graad 6 en graad 7, huistaal

1ste plek: Annemay Schade van Laerskool Welgemoed (Wes-Kaap)

2de plek: Venessa Bouwer van Laerskool Kabega (Oos-Kaap)

3de plek: Jessy Bekker van Laerskool Roodekrans (Gauteng)

 Graad 8 en graad 9, eerste addisionele taal

1ste plek: Sameeha Minty van Al Huda Muslim School (Noordwes)

2de plek: Gavin Swartz van Hoërskool Noord-Kaap (Noord-Kaap)

3de plek: Caitlin Hamilton van Fourways High School (Gauteng)

Graad 8 en graad 9, huistaal

1ste plek: Deandré Jacobs van Hoërskool Grens (Oos-Kaap)

2de plek: Angelique Abrahams van Hoërskool Noord-Kaap (Noord-Kaap)

3de plek: Jenna Steenkamp van Hoërskool Ferrum (KwaZulu-Natal)

Graad 10 tot graad 12, eerste addisionele taal

1ste plek: Nolwazi Mahlangu van Hoërskool Patriot (Mpumalanga)

2de plek: Sethabile Mchunu van Hoërskool Ferrum (KwaZulu-Natal)

3de plek: Kylie van Wyk van Hoërskool De Kuilen (Wes-Kaap)

Graad 10 tot graad 12, huistaal

1ste plek: Lucille Carmen Bray van Hoërskool Sentraal (Vrystaat)

2de plek: Ingrid Groenewald van Hoërskool Ferrum (KwaZulu-Natal)

3de plek: Almé Hugo van Hoërskool Zwartkop (Gauteng)