fbpx

Afrikaans.com-blog: Weer tyd vir jou familie-wegBREEK?

Dis nou daardie tyd van die jaar. Jou brein het gekrimp tot die grootte van ’n babarosyntjie en die laaste goeie voorstel wat jy gehad het hierdie jaar is dat jou werksplek ’n hond moet kry sodat jy hom tydens lunch kan vryf. Jy is op hierdie stadium net seker oor een ding: die vakansie kan nou maar kom!

Jy sien al van Januarie af uit na hierdie Desember-vakansie. Twee weke terug het jy vir jou ’n tweestuk-baaibroek gekoop sodat jy vir die eerste keer sedert die geboorte van jou kinders, jou midrif op Diaz-strand kan wys. Jy en jou maag weet jy gaan nie in hom pas nie, maar wie nie “maag” nie wen nie, of hoe?

Die gym-instrukteur het jou verseker as jy van nou af tien dae ’n week oefen behoort jy voor die begin van die vakansie bobene te hê.

Uiteindelik breek die groot dag aan. Die kar het nog nie eers derderat getref nie, toe begin dit. Jaco Junior het sopas sy ontbyt met die agterste sitplek gedeel, Jacomien se pop kraam en Esmé wil nóú weet waar kom babas vandaan (jy wonder ook, want hierdie drie op die agterste sitplek was beslis nie jou idee nie).

“Hoe ver is dit nog?!” skree jou jongste.

Dis verder as wat jy wil hê dit moet wees. Dis dít. Volgende jaar kamp ons in die agtertuin!

Skielik lui die foon. Dis jou skoonsuster.

“Ek hoor julle is op pad Hartenbos toe? Ag, hoe lekker!”

Hier kom dit nou.

“Hoor hier skoonsus, jy weet mos nou maar hoe benoud raak Kobus se kant van die familie tydens feestyd. Ons het gedink ons kom sommer ook deur Hartenbos toe vir die vakansie dan hou ons ’n lekker groot familie-wegbreek. Ons kan sommer almal julle gazebo deel.”

Ja, daar ís ’n rede hoekom die woord “breek” in “familiewegbreek” is.

Jy dink aan verskonings. Ons hond kan nie die spanning hanteer nie, groot groepe mense op een plek hou ’n brandgevaar in en die bak waarin jy jou Kersfees-trifle gaan maak, is net groot genoeg vir tien mense, nie elf nie.

Dis alles tevergeefs, dink jy. Vanjaar merk die vyfde jaar in ’n ry wat jou familie hulself na jou Kerstafel nooi. Die vyfde jaar in ’n ry wat hulle jou tentpenne leen, jou Kersboom deel en jou man se Kersvaderpakkie beledig. Volgende jaar hierdie tyd boek jy jouself in in ‘n kothuis in die platteland in Spanje. Niemand sal jou daar kry nie.

Jy slaan jou dagboek tevergeefs oop. Jy moet al 6 Januarie 2020 inklok vir werk, sien jy.

Ai … dis laat.

064 652 6873

JOU Afrikaans tel oral en altyd. Vertel ons met die hutsmerk #jouafrikaanstel waar, wanneer of waarom jou Afrikaans tel. Met ons nuutste veldtog bevestig ons dat jy nooit jou taal hoef prys te gee nie, dat Afrikaans oor globale grense strek en dat ons die verskeidenheid in Afrikaans vier. Kyk hier na die veldtog-video’s en neem deel. Onthou om jou naam, van en van watter geweste jy is, by te voeg.