Om ’n opwindende en volgepropte 2025 in te lei, beplan Jannie du Toit sy vierde KUNSTEFEES IN DIE KLEINE oor die naweek van 25 en 26 Januarie in die Fairtree Atterburyteater in samewerking met Pretoria FM. Vier produksies – waarvan nog nie een vantevore by dié teater te siene was nie – word aangebied. Dit belowe om ’n uiteenlopende mallemeule van passievolle kwaliteitmusiek te wees waartydens uitstaande professionele musici die verhoog met Jannie deel – al vyf van hulle graduandi van Tukkies se Musiekdepartement.
Soos Jannie in sy musiekblyspel van 1985, GANSDANS, gesing het:
Man, dit gaan ’n fenomenaalskaalse fees wees!
DIE PRODUKSIES:
Saterdag 25 Januarie 2025
- 09:30 DIE EGGO VAN JOU Oë (openingskonsert) – hartsmusiek by Cowfish Restaurant oorkant die teater in die sentrum – canapé brunch ingesluit.
- 12:00 DIE MAAN DEUR ‘N GAATJIE IN DIE NAG – Marie Tredoux van Jacobsbaai se sielvolle liedjies met bindteks deur haar vriend, Dana Snyman – vroeër ook ’n “Jacobsbaaier”.
- 15:00 MARGARETASTRAAT – Jannie vertel die verhaal van die legendariese “liedjie-aande” van 1981 en ’82 by sy huis in Pretoria.
Sondag 26 Januarie 2025
- 15:00 DE WALS VAN DE LIEFDE – die debuut van Jannie se nuwe program wat bestaan uit sy persoonlike gunstelinge uit die Nederlandstalige kleinkuns van die twintigste eeu: die hoogtepunt van die KUNSTEFEES IN DIE KLEINE.
MEER OOR DIE PRODUKSIES:
- Saam met die hooftjellis van die Johannesburgse Filharmoniese Orkes, Susan Mouton, begin Jannie sy fees om halftien op Saterdag 25 Januarie met ’n program getitel DIE EGGO VAN JOU Oë. Die immergroen liedjie van Gisela de Villiers definieer die essensie van die program wat saam met ’n laat ontbyt aangebied word by Cowfish, ’n baie gewilde restaurant skuins oorkant die teater in die sentrum. Susan en Jannie, wat al veertien jaar gereeld as duo saam werk, betower die gehoor met die magiese kombinasie van kitaar, tjello en stem, wat goue oues se trefkrag tot nuwe hoogtes voer. Die vrolikheid en nostalgie betrek musiek uit die sestigs soos die Beatles en Dylan, van Jannie se eie werk, dié van Jacques Brel en van ’n paar persoonlike musiekvriende waaronder Christa Steyn en Koos Doep. Hierdie aanbieding eindig ’n halfuur voordat die eerste program op die teater se verhoog begin. Omdat ’n canapé brunch ingesluit is by die kaartjieprys, sal aanlyn besprekings vir hierdie produksie om 12:00 op Vrydag 24 Januarie 2025 sluit.
- DIE MAAN DEUR ’N GAATJIE IN DIE NAG is ’n program waarin Jannie die musiek van Marie Tredoux bekend stel – sy jarelange vriendin en ’n legende in Jacobsbaai aan die Weskus. Hy is haar grootste bewonderaar en het in 1988 haar musiek verwerk vir ’n langspeelplaat wat fynproewers gaande gehad het. Van haar liedjies is intussen vir kore verwerk, Laurika het een daarvan opgeneem en nog een verskyn in die nuwe uitgawe van die FAK Sangbundel. Haar liedjies herinner aan die taalvaardigheid, wysheid en aardsheid van digters soos Boerneef en spreek van ’n besondere aanvoeling vir die verhouding tussen taal en musiek. Sy skryf oor die prentjiemooi Jacobsbaai wat in die lente ook blomtuin word, op ’n universele manier ook oor die ongenaakbare see, die droë Sandveld en die Weskus-mense se lief en leed. Saam met Jannie op die verhoog is fluitis Annelie du Plessis en pianis Chanie Jonker. Die bindteks vir die program is deur Dana Snyman geskryf – ’n vriend van Marie wat vroeër op Jacobsbaai gebly het. Die program begin om 12:00 op Saterdag 25 Januarie 2025 op die verhoog van die Fairtree Atterburyteater.
- Om 15:00 op Saterdag 25 Januarie is die bekende pianis, verwerker en musiekregisseur, Chanie Jonker, saam met Jannie op die verhoog in sy produksie MARGARETASTRAAT. Jannie herleef die legendariese en nostalgiese liedjie-aande van 1981 en ’82 by sy huis in Pretoria. Daar is deur die jare dikwels in proefskrifte, dokumentêre programme en deur kunstenaars op verhoë na dié aande in Margaretastraat 28 verwys.
Hy vertel die volle verhaal van dié aande en sing liedjies wat vir die eerste keer by Margaretastraat 28 gehoor is en hy gee perspektief op die rolspelers – Koos Doep, Anneli van Rooyen, Coenie de Villiers, Janita Claassen, Andy Lubbe en vele ander – asook die bydraes wat hulle gemaak het. Lucas Maree het meermale vertel hoe die liedjie-aande hom vir die eerste keer geïnspireer het om in Afrikaans te skryf en te sing. Die wisselwerking tussen liedjieskrywers, teksskrywers, sangers – aspirant en gevestig – maar ook die gehoor, het ’n onmiskenbare rol gespeel in die ontwikkelingsgeskiedenis van moderne ligte Afrikaanse musiek.
- Veertig jaar nadat Jannie du Toit ’n eerste Nederlandstalige liedjie op die Staatsteater se verhoog gesing het, is DE WALS VAN DE LIEFDE van Toon Hermans die titellied van ’n program wat Jannie saamgestel het uit sy persoonlike gunsteling- Nederlandstalige liedjies.
Die frase uit sy weergawe van Jacques Brel se Madeleine: “zij is zo heerlijk, heerlijk” het deur die jare inslag in die volksmond gekry en by sy konserte is daar altyd weer versoeke vir sy “Hollandse” liedjies: Madeleine en Marieke van Brel, Ik zou wel eens willen weten van Jules de Corte, Achter de horizon van Robert Long, Belastingcontroleur van Urbanus en De kleine man van Louis Davids. Nou kry musiekliefhebbers die geleentheid om al die “toppers” in een program te hoor.
Saam met sy kitaar word Jannie in DE WALS VAN DE LIEFDE op klavier en alt-saxofoon begelei deur die uiters musikale egpaar Marcel en Deryn Dednam, wat ’n paar jaar gelede pryswenners in Jannie se ’N NUWE BAADJIE-kompetisie was. Marcel het bekendheid verwerf as begeleier vir Nataniël, Anna Davel, Leon Gropp en andere en Deryn is – soos Marcel – gereeld deel van Anna Davel se ensemble. Albei is musiekonderwysers in Pretoria.
Die produksie debuteer om 15:00 op Sondag 26 Januarie 2025 as hoogtepunt van Jannie se KUNSTEFEES IN DIE KLEINE by die Fairtree Atterburyteater in samewerking met Pretoria FM.
Bespreek by seatme.co.za
Bespreek vir meer as een produksie wat in die teater self aangebied word, en kry 30% afslag daarop.
SOSIALEMEDIASKAKELS
Facebook: https://www.facebook.com/JannieduToitBlad
YouTube: https://www.youtube.com/channel/UCoMAu3dxQnKK-CYJhDR7iFg
Webwerf: www.janniedutoit.com
