Elke stap in ’n bredie speel ’n belangrike rol om dit geurig te maak. Hierdie groenboontjiebredie is so ’n eenvoudige resep, maar met die regte geurkombinasies en metode, beslis ’n wonderlike ete. As jy gelukkig genoeg is om dit in die hande te kry, is waterblommetjies in die winter ’n heerlike afwisseling vir die boontjies.
Lewer 6 porsies
30-45 ml (2-3 e) olyfolie
1 kg skaapstowevleis aan die been, bv. skouer, nek of skenkels, in skywe gesny
2 uie, in wiggies gesny of 8-10 piekeluitjies, in kwarte gesny
250 ml (1 k) droë witwyn of hoenderaftreksel
30 ml (2 e) vars tiemie of 15 ml (1 e) gedroogde tiemie
3 wonderpeperkorrels
3 heel naeltjies
2 heel lourierblare
15 ml (1 e) druiwe- of witwynasyn
3 knoffelhuisies, gekneus
1 brandrissie, fyngekap of ’n knippie rooipeper (cayenne peper) na smaak
300 g groenboontjies, in derdes gesny of waterblommetjies, skoongemaak
2-3 middelslagaartappels, geskil en in blokkies gesny
sap van 2 suurlemoene
2 heel kaneelstokkies
sout en peper na smaak
- Verhit olie oor ’n matige temperatuur in ’n groot kastrol en verbruin vleis in sarsies tot goudbruin. Skep uit en hou eenkant.
- Plaas uie in dieselfde kastrol en soteer tot amper sag. Roer wyn of aftreksel, kruie, speserye, asyn, knoffel en brandrissie of rooipeper by. Bring oor matige temperatuur tot kookpunt. Skep vleis terug in kastrol, verlaag hitte en prut baie stadig, met die deksel vir ongeveer 1 uur of tot die vleis feitlik sag is.
- Voeg groenboontjies of waterblommetjies, aartappels, suurlemoensap en kaneelstokkies by en prut stadig vir nog 30 minute of tot groente sag, maar nie pap is nie.
- Geur na smaak met sout en peper en nog suurlemoensap indien nodig. Sit op bruinrys voor.
Resep deur Heleen Meyer | Fotokrediet: LiG Tydskrif | Fotograaf: Berna Coetzee
Taalfokus
‘Bredie’ is een van die pragtige Afrikaanse woorde wat al vir baie lank deel van ons woordeskat is. Maar so baie mense verwys na ’n ‘stew’, dat ‘bredie’ soms amper vergete is.
