Skrywer: Alita Steenkamp
Het jy destyds jou heel eerste Harry Potter-boek in Afrikaans gelees? Het jy nou al jou eie kinders vir wie jy ook hierdie voorreg gun? Dan is daar goeie nuus. Elretha Britz berig op Netwerk 24 dat die volledige reeks Harry Potter-boeke weer in Afrikaans uitgegee gaan word en die eerste boek in die reeks, Harry Potter en die Towenaar se steen, sal op 19 April in die winkels beskikbaar wees. Daarna sal daar elke maand ʼn nuwe Harry Potter-boek in Afrikaans verskyn totdat die reeks weer volledig in Afrikaans beskikbaar is.
NB-Uitgewers het destyds die trefferboeke van J.K. Rowling in Afrikaans laat vertaal. Met die eerste Afrikaanse vertaling is sommige van die karakters se name verander om meer Afrikaans te klink. So het Dumbledore Dompeldorius geword en Hermione was Hermien. Iets waaroor daar in sommige kringe kritiek was. Daar gaan in die nuwe vertalings egter glad nie afgewyk word van die name wat J.K. Rowling geskep het nie. Wat wel anders gaan wees, is die omslagontwerp, maar dit is vasgemaak in ʼn ooreenkoms met die skrywer.
Mia de Beer, uitgewer van kinderboeke by NB-Uitgewers, sê hulle het al hoe meer versoeke gekry om die geliefde karakter weer te laat Afrikaans praat aangesien die boeke al tien jaar uit druk uit is. Daar is besluit om aan hierdie versoek te voldoen en teen Oktober vanjaar sal die hele reeks in Afrikaans beskikbaar wees.
Die Harry Potter-boeke is in meer as 80 tale vertaal en daar is volgens Wikipedia al meer as 600 miljoen Harry Potter-boeke verkoop.
Die sewende en laaste boek in die reeks, Harry Potter and the Deathly Hallows het in 2007 verskyn. Die Afrikaanse vertaling, Harry Potter en die Skatte van die dood, het in Julie 2008 verskyn.
Nadat die eerste twee Afrikaanse Harry Potter-boeke verskyn het, het Suzette Kotzé, ʼn vryskutskrywer en uitgewer op LitNet geskryf: “Die eerste twee Harry Potter-boeke, Harry Potter en die Towenaar se Steen en Harry Potter en die Kamer van Geheimenisse, is nou danksy die uitgewer Human & Rousseau ook in Afrikaans beskikbaar, en watter wonderlike wins is dit nie vir alle Afrikaanse lesers nie.” Die merkwaardige verhaal van J.K. Rowling se sukses met hierdie boekreeks, bly steeds een van die dinge wat ʼn mens sprakeloos laat. Joanne Rowling was op die tydstip toe sy Harry Potter uitgedink het, so arm dat sy nie verwarming vir haar woonstel in Skotland kon bekostig nie en het daagliks in ʼn koffiewinkel naby haar huis gaan sit en skryf. Die boek is eers deur twaalf uitgewers afgekeur, maar uiteindelik het Bloomsbury die dapper stap gewaag en die avonture van die seun wat na ʼn towerskool gaan en daar hope avonture beleef, uitgegee. Die res, soos hulle sê, is geskiedenis.
