Hartklop: Tien dinge om te weet

Skrywer: Alita Steenkamp

Op Dinsdagaand 18 Julie begin ŉ splinternuwe dramareeks op kykNET, Hartklop. Hierdie is kykNET se eerste mediese drama en is soortgelyk aan reekse soos Grey’s Anatomy, The Good Doctor en New Amsterdam. Die nege hoofkarakters in hierdie reeks is almal dokters, maar elkeen is op ŉ verskillende plek in sy of haar loopbaan en elkeen se agtergrond en storie verskil.

Die nege hoofrolle word vertolk deur Simoné Pretorius, Carla Classen, Oros Mampofu, Renate Stuurman, David Louw, Leandie du Randt, Marlee van der Merwe, Jacques Bessenger en Dawid Minnaar. Ander spelers sluit in Christel van den Bergh, Christo Davids, Esmeralda Bihl, Rika Sennett en Franci Swanepoel. Dit was Franci se laaste rol voor haar ontydige dood in 2022.

Die volgende tien dinge sal jou so ŉ bietjie meer daarvan vertel:

Hartklop is kykNET se eerste mediese reeks waar daar op ’n geval per episode gefokus word. In TV-terme word daar van “procedural” gepraat, met ander woorde daar is ’n probleem, dit word ondersoek en dan in een episode opgelos. Binnelanders, wat as dramareeks in 2005 begin het en in 2011 ’n daaglikse reeks (sepie) op kykNET geword het, verskil van Hartklop in die sin dat die mediese gevalle soms oor verskeie episodes behandel word en dat die hoofkarakters die storie dryf.
Die reeks is deur Zoë Laband geskryf. Sy was onder meer die skrywer en regisseur van die rolprent Pinky Pinky wat by verskeie internasionale filmfeeste te sien was. Zoë het in 2007 ’n beurs gewen om aan die York Universiteit in Toronto, Kanada te gaan studeer waar sy haar meestersgraad (cum laude) in draaiboekskryf verwerf het. Sy het ’n SAFTA-toekenning as beste skrywer van ’n komedie vir Those Who Can’t gewen en was die skrywer van The Girl from St. Agnes wat op Showmax te sien is.
Hartklop is in Engels geskryf en deur die meester-vertaler Kobus Geldenhuys in Afrikaans vertaal. Kobus was vir die Afrikaanse vertalings van boeke van onder meer J. K. Rowling, Roald Dahl, C.S. Lewis en David Walliams verantwoordelik.
Elkeen van Hartklop se episodes het ’n mediese adviseur gehad en die Afrikaanse tekste is ook deur ’n mediese dokter nagegaan om seker te maak dit is feitlik en taalkundig korrek. Opgeleide teatersusters was deel van die opnames van die operasietonele en het gehelp met die mediese toerusting wat benodig is.
Die oorspronklike musiek vir die reeks is deur Dawie de Jager van Klopjag-faam geskryf. Dawie is die broer van Sallas de Jager wat ook ’n filmregisseur en musikant is.
David Louw (dr. Louw van Onselen) en Christel van den Bergh (Anke Dempsey) speel dalk skelm minnaars, maar is in die werklike lewe getroud. Hulle is ouers van twee seuns, Daniel en Laudo, en woon deesdae op ’n plaas in die Vrystaat.
Dit is nie die eerste keer dat Carla Classen (dr. Karima Salie) en Simoné Pretorius (dr. Elani Breytenbach) saam op die skerm is nie – hulle was beide te sien in die fliek Stroomop wat in 2018 vrygestel is.
Jacques Bessenger (dr. Daniel Strydom) het in 2003 sy TV-debuut as Mossie in Song vir Katryn Song vir Katryn was die eerste oorspronklike dramareeks wat kykNET vervaardig het. Dit het 15 November 1999 begin uitsaai. Jacques was intussen te sien in verskeie reekse onder meer Fynskrif, Dwaalster en Donkerbos.
Christo Davids is nie net in Hartklop te sien as dr. Veronica Pietersen (Renate Stuurman) se man, Sollie, nie, hy is ook saam met Harold Hölscher die mede-regisseur. Christo, wat in 2008 ’n LL.B-graad aan die Universiteit van die Wes-Kaap behaal het, het in 1994 sy debuut as akteur gemaak toe hy die rol van Dial September in die TV-reeks Onder Engele gespeel het. Die veelsydige Christo was ook ’n regisseur op Spoorloos: Die Eiland wat verlede jaar uitgesaai is.
Hartklop is in Johannesburg verfilm en die hospitaaltonele is in sale en teaters by die Solomon Stix Morewa-gedenkhospitaal in Eloffstraat in Selby en by die Universiteit van die Witwatersrand verfilm. Die Solomon Stix Morewa-gedenkhospitaal was tydens verfilming buite gebruik, maar is intussen weer as hospitaal ingerig.