In ʼn berig wat op Netwerk24 verskyn, doen Murray La Vita volledig verslag oor ʼn gesprek wat gevoer is as deel van die Praat Saam-diskoersreeks op vanjaar se KKNK. Die onderwerp van hierdie gesprek is: Is die nuusaanbod in Afrikaans voldoende? Die deelnemers aan hierdie gesprek was Theresa Olivier, adjunkredakteur van Netwerk24, Nicolene de Wee, uitvoerende regisseur van RSG se nuus- en aktualiteitsprogramme en emeritus professor Johannes Froneman, mediakommentator en kurator van die digitale mediamuseum mediamense.com. Jody Hendricks was die gespreksleier.
Die volgende 10 punte som die gesprek op:
- Netwerk24 sal altyd bly groei en daar sal altyd ʼn soeke wees na nog nuus in Afrikaans, aldus Theresa Olivier.
- Die oorgrote meerderheid van mense wat Afrikaans praat is bruin en veral op die platteland en ons gaan beslis nog lank ʼn Afrikaanse gemeenskap in Suid-Afrika hê. – Theresa Olivier.
- Die diversiteit binne die gedrukte nuusaanbod het drasties verminder in die laaste paar jaar weens die talle publikasies wat toegemaak het, aldus prof Froneman.
- Die Burger, Beeld en Volksblad is vir alle praktiese doeleindes streekuitgawes van wesenlik dieselfde nuusinsamelingsproses. – Prof Froneman.
- In die uitsaaimedia gebeur daar baie positiewe dinge met meer as 200 gemeenskapsradiostasies wat ook in Afrikaans uitsaai.
- Die nuutste navorsing wat onder RSG-luisteraars gedoen is, toon aan dat 64% van die luisteraars graag na nuus wil luister, aldus Nicolene de Wee.
- Die Afrikaanse aanbod op die uitsaaimedia is wesenlik beter as die aanbod in die 80’s.
- Gedrukte Afrikaanse koerante is amper geskiedenis, maar die radio is ʼn ander storie, aldus prof Johannes Froneman.
- Daar het talle digitale nuusplatforms bygekom soos Netwerk24, maar ook Maroela Media en AfriNuus.
- Die nuusaanbod het dus verskuif van gedrukte media na uitsaai en digitaal.
Die gesprekspaneel was dit eens:
Solank as wat daar mense is wat Afrikaans praat, sal Afrikaanse radio geluister word, en sal mense honger wees om nuus in Afrikaans te kry.
