Fiësta-wenners

Die wenners van vanjaar se Fiësta-toekennings is op Donderdagaand 9 Maart by ’n intieme funksie by The Lookout in Kaapstad se Waterfront aangekondig.

Die Fiëstas vereer hoofsaaklik verhoogproduksies wat op kunstefeeste reg oor die land gedebuteer het. Vanjaar was die 13^e keer dat hierdie geleentheid plaasgevind het. Suidooster  se Kaashifa, Jawaahier Petersen en Fraksie se Henk, Melt Sieberhagen, het as seremoniemeesters opgetree. Schalk Joubert, Ramon Alexander en Babalwa Mentjies het vir heerlike musikale vermaak gesorg.

Benewens die pryse wat in die dertien kategorieë uitgedeel is, is twee besonderse mense ook vir hulle lewensbydrae tot die kunste vereer. Hulle is dr. Diana Ferrus, ’n skrywer, digter en aktivis en die musiek-maestro prof. Hubert van der Spuy.

Die wenners in die onderskeie kategorieë is:

Beste spel in ’n hoofrol

Sandra Prinsloo vir Die moeder (US Woordfees)

Beste spel in ’n ondersteunende rol

Carlo Daniels vir Ek, Anna van Wyk (KKNK)

Beste regie

Christiaan Olwagen vir Die moeder (US Woordfees)

Beste teaterontwerp

Gideon Lombard vir die klankbaan en ontwerp van Karatara (KKNK, Suidoosterfees)

Beste nuutgeskepte Afrikaanse teks, verwerking of vertaling

Adriaan Havenga vir Iewers in die grys (US Woordfees)

Beste prestasie in klassieke musiek

Handel at Home (US Woordfees, KKNK)

Beste prestasie in visuele kuns

Pitika Ntuli vir Azibuyele Emasiswene / Terugkeer na die bron (Vrystaat Kunstefees)

Beste musiekgedrewe produksie

Prima Donna (KKNK)

Beste bydrae tot ’n musiekgedrewe produksie

The Ancient Voices (Nomapostile Nyiti en Lungiswa Plaatjies) vir Die oerkluts kwyt (KKNK, Suidoosterfees, Aardklop)

Beste feesproduksie

Die moeder (US Woordfees)

Beste opkomende kunstenaar

Adriaan Havenga: teks vir Iewers in die grys en sy spel en teks vir Om skoon te wees (Woordfees en KKNK)

Blou Fiësta

Stemme (Suidoosterfees)

Waldimar Pelser, M-Net-direkteur: Premium-kanale sê dat die verhoogkunstenaars wat gehore die afgelope jaar dwarsdeur die land op besonderse maniere geraak het in die verskillende produksies, is helde wat erkenning verdien. Die kunstenaars wat die tydsgees reg kon lees en besonderse werk kon skep, het uiteindelik as die wenners weggestap.

Die toekennings is nie vanjaar regstreeks uitgesaai nie, maar Fiësta se program op 24 Maart sal aan die glansaand gewy word en ’n insetsel van die aand sal op Bravo! op 26 Maart gewys word.