Skrywer: Persverklaring
Dit is met groot opgewondenheid dat Netwerk24 die nuutste toevoeging tot sy intekenaar-aanbod bekendstel: digitale blokraaisels en aanlyn speletjies.
“Ons juig oor hierdie nuwe toevoeging tot Netwerk24 se aanbod en die waarde wat dit vir ons intekenare bied,” sê Henriette Loubser, hoofredakteur van Netwerk24 en Afrikaanse Nuus.
“Ons weet hoe passievol veral Afrikaanse blokraai- en speletjiegeesdriftiges oor hierdie verslawende tydverdryf is. Dis mos ’n heerlike gevoel van genoegdoening om ’n raaisel te ontrafel en te sien hoe die letters en syfers netjies in plek val.”
Elke dag se speletjies sal maklik op die Netwerk24-tuisblad of in die nuwe Speel-afdeling gevind kan word. In die app sal jy ’n kortpad-skakel kry wanneer jy op die Vind als-knoppie op die onderste navigasie in die app druk.
Speletjies-entoesiaste kan dus élke dag terugkeer na Netwerk24 vir daardie dag se blokraai, sudoku en woordblom. Vinnige daaglikse ontspanning so tussendeur die nuus van die dag!
Benewens die dag se blokraai en sudoku kan jy ook voriges in ’n argief gaan speel, maar daar is slegs een woordblok op ’n keer beskikbaar.
Elke Vrydag sal Netwerk24 oudergewoonte ’n nuusvasvrae aanbied sodat intekenare hul kennis van die week se groot nuusgebeure kan toets.
Jy kan hierdie speletjies teen tyd speel en jou uitslae op sosiale media met ander deel. As jy moet wegglip voor jou speletjie klaar is, sal jou vordering in die speletjie gestoor word en kan jy gerieflik terugkeer om verder te speel.
Die blokraaie is vars en oorspronklik en spesiaal ontwikkel vir Netwerk24.
“Nes blokraaisels, sudoku en woordspeletjies oor dekades heen ’n belangrike deel van ons gedrukte publikasies se DNS was, gaan dit nou ook ’n integrale deel van Netwerk24 raak. Heel eerste op my persoonlike lys is elke dag se woordblom!” aldus Loubser.
Besoek Netwerk24.com of laai die app af en speel saam. Nuwe intekenare kan Netwerk24 se inteken-aanbod gratis op die proef stel vir 7 dae alvorens hulle hoef te betaal.
