Die PAPPA-effek: Hoe is pa’s belangrik?

Skrywer: Nikki Bush

Hoekom is pa’s belangrik? Een van die positiewe gevolge van die pandemie, is dat mans ook van die huis af moes werk en steeds werk en daarom algaande besef het wat die antwoord op die vraag is.

Elke keer as ek saam met ’n span werk, voer ek een-tot-een-onderhoude met die personeel. Hieruit het ek agtergekom dat veral mans in bestuurs- of uitvoerende posisies, besef het dat hulle dit geniet om meer deel van hulle kinders se daaglikse lewens te wees. Hulle sien hulle by ontbyt, middag- en aandete en kan hulle dophou gedurende die dag. Daar is ook drukkies wanneer hulle van die skool af kom. Soveel anders as voor-Covid wanneer hulle dikwels laat saans tuis gekom het – net betyds om hulle kinders nag te soen.

Dus … hoekom is pa’s so belangrik in hulle kinders se lewens?

Die manier hoe pa’s hulle kinders behandel, het ’n enorme impak op kinders se latere selfwaarde en selfrespek.

Hier is vyf maniere vir pa’s om hulle vaderskappunte te verdien.

Ek noem dit die PAPPA-effek.

P – PRESENT (TEENWOORDIG)

A – AVAILABLE (BESKIKBAAR)

P – PROTECTIVE (BESKERMEND)

P – PROUD (TROTS)

A – ATTENTIVE (OPLETTEND/GEE AANDAG)

Kom ek verduidelik dit so:

– Wees teenwoordig  – emosioneel, maar ook fisies

– Wees beskikbaar – moenie so besig wees dat jou kinders dink jy gee nie om nie

– Wees beskermend – pa’s is ’n simbool van fisiese en emosionele sekuriteit

– Wees trots – leer jou kinders om hulself waardig te ag deur hulle te waardeer en in hulle te glo

– Wees oplettend – gee aandag, luister, praat en deel

Ons het Sondag, 19 Junie, Vadersdag gevier. Tog, is daar talle kinders in ons land wat nie die voorreg het om die PAPPA-effek te ervaar nie. Trouens, ons woon in ’n land waar:

• Ons so dikwels sien en ervaar hoe sekere mans hulle mag misbruik – hetsy in ons eie geledere of op die nuus.
• Nagenoeg 60% van ons kinders afwesige pa’s het – soos bevind in ’n studie deur die Raad vir Geesteswetenskaplike Navorsing en die Suid-Afrikaanse Instituut vir Rasseverhoudinge.  Hierdie vyf jaar lange studie beweer ook dat kinders wat sonder pa’s grootword meer geneig is om emosionele versteurings en depressie te ervaar.

My wens is dat alle kinders gemaklik sal voel om hulle pa’s se taaiheid en teerheid te kan vertrou. Maak daarom seker dat jou kinders nie bang is vir jou nie, maar moet ook nie al die dissipline-pligte aan hulle ma oorlaat nie.  Daar is nie ’n “ideale” manier om ’n pa te wees nie en jy hoef ook nie ’n superheld te wees nie. Jou kinders wil eintlik maar net ’n alledaagse held hê – iemand wat op ’n werklike en tasbare manier daar is vir hulle.

Dit maak ook nie saak hoeveel geld jy maak of watter werk jy doen nie – solank as wat jy jou bes doen. Dit maak nie saak of jy jou liefdevolheid wys of jou kinders op ’n minder sigbare wyse liefhet nie. Die vraag is: Weet hulle dat jy lief is vir hulle en vir hulle omgee? Wat saak maak, is dat jy toegewyd is aan jou kinders en langdurig by hulle lewens betrokke is. Dat jy jouself met hulle deel en maniere vind om hulle te waardeer vir wie hulle is en nie net vir wat hulle doen nie.

Wat doen jy om jou vaderskappunte vanjaar by jou eie kinders te verdien, of om dalk ’n onbesonge held in die lewe van ’n ander kind te wees wat nie ’n pa as ’n rolmodel het nie?

• Reёl ‘n pa-en-dogter-afspraak
• Gaan op ’n pa-en-seun-avontuur
• Kamp saam met jou kinders in die tuin (wag maar tot dit warmer is!)
• Lees vir hulle stories voor as hulle jonger as 10 jaar oud is – jou stem klink uniek en het ’n spesiale plek in hulle harte
• Kook saam met hulle
• Leer hulle om ’n vuur te pak en aan te steek – so bly hulle ook veilig
• Volgende keer as jy die swembadwater toets (as julle een het), betrek hulle en wys hulle hoe dit gedoen word – dit is ’n wetenskapeksperiment
• Nooi hulle om saam kar  te was – dit leer hulle die verantwoordelikheid en om vir hulle besittings om te gee
• Wys dat jy vir hulle ma omgee en haar respekteer
• Indien jy en jou kinders se ma nie in ‘n verhouding is nie, kry maniere om ‘n veilige en neutrale plek tussen julle te skep – ‘n spasie waar die kinders nie blootgestel word aan volwasse kwessies, indien enige, nie.