Suid-Afrikaners is lief vir braai en met hierdie resep kan jy selfs nagereg oor die kole voorberei. Gebruik jou keuse van seisoensvrugte en geur dit met die kaneel, heuning, suurlemoensap en botter. ’n Skeppie ongegeurde jogurt of roomys is perfek hierby. Die resep sal beslis almal beÏndruk en laat elkeen hul eie pakkie “bou” – dis so maklik.
Lewer 4 – 6 porsies
swaargewigfoelie
1 klein pynappel, in blokkies gesny
3-4 sagte sitrus of naartjies, geskil en oor die breedte in dik skywe gesny, of mango
100-125 g vars of bevrore bloubessies
200-250 g vars of bevrore aarbeie, gehalveer
10 ml (2 t) heuning per pakkie
gemaalde kaneel
vars suurlemoensap, Rooibostee of ’n bietjie port of vrugte-likeur na smaak
’n klontjie botter per pakkie
Om mee voor te sit
makadamianeute, gerooster en grofgekap (sien wenk)
geroosterde klapperskaafsels (sien wenk)
papawersaad
200-250 ml Griekse jogurt
- Voorverhit die oond tot 180 °C of beplan om die pakkies oor matige kole te rooster. Skeur 4-6 stukke foelie van ongeveer 25 x 25 cm elk en vou elkeen dubbeld, sodat die blinkkant na bo wys.
- Verdeel die vrugte tussen die foelie en bedruip met die heuning. Strooi kaneel oor en druk ’n skeut suurlemoensap (of vloeistof van jou keuse) oor die vrugte. Stip met ’n klontjie botter.
- Vou die punte van die foelie na bo en vou dit saam om ’n losserige pakkie te vorm. Die vrugte moet heeltemal toe wees, sodat die stoom binne die pakkie bly. Wees versigtig dat die foelie nie skeur nie.
- Rooster die pakkies 10-15 minute oor matige kole of in die oond tot die vrugte deurwarm en effens sag is. Maak een pakkie oop om te kyk hoe gaar dit is, maar wees versigtig, moenie met die stoom brand nie.
- Sit ’n warm pakkie per persoon in ’n bakkie voor en laat elkeen kies met watter van die bykomstighede hulle dit wil eet.
Resep aangepas uit Kos is op die tafel!, deur Heleen Meyer | Fotokrediet: LiG-tydskrif | Fotograaf: Berna Coetzee
Wenke
- Ryp appelkose, nektariens of perskes sal ook heerlik wees, wanneer dit in seisoen is.
- Rooster klapper oor ’n matige hitte in ’n pan tot goudbruin. Hou dit dop – dit brand redelik maklik.
- Plaas die heel makadamianeute op ’n bakplaat en rooster in die oond teen 180 °C vir 10-15 minute. Laat dit afkoel en kap dan grof.
