Bobotie met ’n appelkrummellaag en Nutella-broodpoeding (Stoofstories met Marinda: Min Shaw)

Tuis 5 Kook dit 5 Bobotie met ’n appelkrummellaag en Nutella-broodpoeding (Stoofstories met Marinda: Min Shaw)
Stoofstories

Min Shaw is ’n legende in ons land se musiek- en vermaakbedryf. Marinda maak ’n heerlike bobotie met ’n appelkrummellaag en Min se ouma se broodpoeding met ’n Nutella-kinkel! Kyk Stoofstories met Marinda op VIA, DStv-kanaal 147 op Woensdae om 17:00.

BOBOTIE

Lewer 4-6 porsies

Bobotielaag

bietjie kookolie
2 groot uie, fyngekap
30 ml kerriepoeier
10 ml borrie
5 ml komyn
1 kg maalvleis
20 ml appelkooskonfyt
60 ml vleisaftreksel
1 klein blikkie tamatiepasta
90 ml blatjang
50 ml asyn
20 ml suiker
10 ml vars gemmer, fyngerasper
sout en varsgemaalde swartpeper na smaak

  1. Voorverhit die oond tot 180 °C.
  2. Smeer ’n oondbak.
  3. Gooi ’n klein bietjie olie in ’n kastrol en braai die uie tot sag en deurskynend.
  4. Voeg kerriepoeier, borrie en komyn by en braai saam.
  5. Voeg die maalvleis by en braai tot dit liggies begin kleur kry.
  6. Meng die res van die bestanddele in ’n beker en gooi dit dan by die vleis.
  7. Laat dit prut vir so 10 minute en gooi dit dan in ’n oondbak.

Appellaag

1 blik tertappels
10 ml vlapoeier
10 ml witsuiker
5 ml botter
250 ml goue sultanas, geweek in rooibostee

  1. Kook al die bestanddele vir die appellaag stadig saam totdat dit dikkerig raak.
  2. Druk dit fyn en skep egalig oor die vleislaag in die oondbak.

Bo-kors

250 ml meelblom
5 ml bakpoeier
5 ml suiker
125 g botter
250 ml gerasperde cheddarkaas

  1. Meng al die bestanddele goed tot dit soos sand lyk.
  2. Krummel dit bo-oor die appellaag.
  3. Bak die bobotie vir 30 minute totdat die kors mooi goudbruin raak.

NUTELLA-BROODPOEDING

Lewer 4-6 porsies

8 croissante
1 potjie Nutella-sjokoladesmeer
500 ml room
250 ml melk
4 eiers
5 ml vanieljegeursel
125 ml strooisuiker

  1. Sny die croissante middeldeur en smeer dit dik met die Nutella.
  2. Pak die gesmeerde croissante soos dakteëls oormekaar in ’n oondvaste bak.
  3. Meng die room, melk, eiers, vanieljegeursel en strooisuiker goed.
  4. Gooi dit oor die croissante.
  5. Laat dit staan vir 60 minute.
  6. Bak dit dan vir 40 minute by 180 °C.
  7. Haal dit uit die oond en sit voor met vla of roomys.

Resepkrediet: Stoofstories met Marinda en Min Shaw.

by | Mar 30, 2022 | Kook dit

Deel hierdie plasing