“Pot roast” (potbraai) en konfyttert met beleë cheddarkaas (Stoofstories met Marinda: Jenny Morris).

Tuis 5 Kook dit 5 “Pot roast” (potbraai) en konfyttert met beleë cheddarkaas (Stoofstories met Marinda: Jenny Morris).
Stoofstories

Jenny Morris is ’n skrywer, radio- en TV-persoonlikheid, sjef en koskenner van kindsbeen af toe sy lekkernye moes maak vir skool-geldinsamelings. Marinda maak ’n geurige “pot roast” en konfyttert met verouderde cheddarkaas.

“POT ROAST” (POTBRAAI)

Lewer 6-8 porsies

30 ml olyfolie
1,5 kg ontbeende “chuck roast” (dikrib)
sout en peper
1 ui, in ringe gesny
4 knoffelhuisies, fyngekap
500 ml beesvleisaftreksel
250 ml rooiwyn
2 vars tiemietakkies
2 roosmaryntakkies
2 lourierblare
5 aartappels, geskil en gehalveer
6 groot wortels, geskil en in kwarte gesny

  1. Verhit die oond tot 180 °C.
  2. Verhit die olie in ’n swaarboompot wat in die oond kan gaan.
  3. Geur die vleis met sout en peper en braai bruin in die pot.
  4. Haal die vleis uit en verbruin die uie en dan ook die knoffel in dieselfde pot.
  5. Gooi die res van die bestanddele, behalwe die aartapppels en wortels, in die pot.
  6. Sit die deksel op en los dit in die oond vir 2 ure.
  7. Voeg die aartappels en wortels by en geur met sout en peper na smaak.
  8. Maak weer die pot toe en sit dit in die oond vir nog ’n uur, of totdat die vleis sag is.

KONFYTTERT MET BELEË CHEDDARKAAS

Lewer 6-8 porsies

200 g meel
10 ml versiersuiker
100 g botter, yskoud en in blokkies gesny
1 groot eiergeel
10 ml yskoue water
500 g appelkooskonfyt

  1. Sif die meel en versiersuiker in ’n mengbak.
  2. Vryf die botter met die vingers in totdat dit soos nat sand lyk.
  3. Klits die eiergeel en yskoue water in ’n beker.
  4. Maak ’n gaatjie in die middel van die meel en werk die eiermengsel in totdat dit ’n deeg vorm.
  5. Vorm die deeg in ’n bal en maak toe met kleefplastiek. Los dit vir ten minste 30 minute in die yskas.
  6. Rol die deeg uit op ’n oppervlak wat liggies met meel bestrooi is.
  7. Sit dit oor die rolstok en laat dit gly in ’n gesmeerde losboomtertpan.
  8. Druk die deeg vas met die hande en sny die kante af.
  9. Sit dit weer vir ’n uur in die yskas.
  10. Bak die tertkors blind teen 190 °C vir 10 minute.
  11. Smeer die konfyt in die tertkors en bak vir 30 minute, of totdat die konfyt in die tertkors gestol het.
  12. Geniet dit met beleë cheddarkaas.

Resepkrediet: Stoofstories met Marinda en Jenny Morris

by | Mar 3, 2022 | Kook dit

Deel hierdie plasing