Skrywer: Lara Erasmus
Die akteur Ruan Wessels het nie bekendstelling nodig nie … In films en programme soos Binnelanders, Hoofmeisie, en Spoorloos word hy reeds van ‘n jong ouderdom af in die vermaaklikheidsbedryf gerespekteer en op al wat ‘n rooitapyt is, verwelkom. Met die bekendstelling van sy digbundel, Dronk & Danig, onthul Ruan ‘n selfs dieper en meer persoonlike kant van homself en bewys hy dat hy net so talentvol is as digter as akteur.
Dronk & Danig is ‘n eerste van sy soort in Suid-Afrika en word deur Ruan beskryf as ‘’baie meer as net ‘n gewone digbundel’’. Dit is om dié rede dat hy eerder daarna verwys as ‘n gedigte-album. Die boeiende gedigte uit sy pen word deur Ruan self voorgedra met spesiaal gekomponeerde musiek in die agtergrond om ‘n treffende atmosfeer – of ‘n ‘vibe’ (soos hy dit noem) – te skep. ‘n Aantal van hierdie voorlesings is onderaan hierdie artikel beskikbaar – moet dit nie mis nie! Die gedigte is natuurlik ook in boekformaat beskikbaar vir diegene wat dit so verkies en kan dit direk bestel word deur ‘n boodskap aan sy Instagram-profiel te stuur.
“In vandag se tyd sal jonger mense eerder na iets luister, veral omdat gedigte persoonlik is. Ek dink as ’n mens daarmee identifiseer en dit vir jou persoonlik raak, is dit net anders om dit direk uit die skrywer se mond te hoor, in plaas daarvan om dit op papier te lees,” verduidelik hy. “Die wonderlike span by Muse Studios het my gehelp met die musiek. Hulle was ook betrokke by die eerste gedig wat ek omtrent ’n jaar terug vrygestel het, met die naam Ongeduldige Kuns.”
– Ruan Wessels
Met die publikasie van sy gedigte-album sowel as sy jare ervaring in die vermaaklikheidsbedryf, is Ruan ‘n uitstekende en passievolle voorbeeld en kon ons nie anders as om hom beter te leer ken nie. Soos Afrikaans.com al met ‘n aantal vorige persone gedoen het, het Ruan ook sy insigte op van Timothy Ferris se Tribe of Mentors-vrae gedeel.
Vertel ons meer van jou gedagtes agter die bundel en waarom jy juis gekies het om dit so te doen?
Die bundeltjie is iets wat ek al lank oorweeg en uiteindelik die guts gekry het om af te handel. Ek en ʼn pel sou aanvanklik dit saam gedoen het, ons was DRONK&DANIG … Hy moes toe ongelukkig wegtrek en ek wou nog steeds die projek afhandel. Die album is ʼn tipe huldeblyk aan my vriend en waar dit alles begin het. Om die gedigte as liedjies op te neem, kom van Kabous Verwoed af. Sy album “Beenkamers en gange” het my geïnspireer om my eie liedjies op te neem.
Jy is al van ‘n jong ouderdom af in die kollig.
Met watter uitdagings kom die oorgang van kinderakteur na volwasse-akteur?
Die grootste uitdaging vir my is om weg te breek van die jonger karakters af. Gelukkig, soos ʼn mens ouer raak, verloor jy jou “baby face”.

Jy het geen formele opleiding nie. Dit maak natuurlik sin omdat jy reeds op skool professionele akteurswerk begin doen het.
Wat sal jou raad wees aan voornemende akteurs wat graag in die bedryf wil naam maak?
Sjoe, wat kan ek sê wat nie al klaar gesê is nie? Glo in jouself, dis tough daar buite. Niemand gaan so baie in jou glo soos jy in jouself moet nie.
Jy was die slagoffer van boeliery. Wat is jou advies aan ander persone wat daaronder ly?
Dink jy daar is iets wat ons as samelewing kan doen om dit beter te beheer?
Ek is geboelie, ja. As mens jonk is, het jy baie te sê sonder om te dink aan die gevolge. Daar is seker baie goed wat ons kan doen om sulke goed te probeer voorkom. Ek dink veral ouers moet maar net ʼn tipe bewusmaking skep in hulle kinders, ‘’open-mindedness’’ kweek, en ook hul kinders van jongs af leer dat nie alle mense dieselfde is nie … en dat dit ook nie nodig is nie.
Wat is ’n ongewone gewoonte wat jy het, of iets skynbaar absurd wat jy baie graag doen?
Wanneer ek ʼn Super M-melkskommel drink, byt ek altyd ʼn gaatjie onder in die bottel uit en drink dit so – al van kleins af.
Wat is een van die beste beleggings wat jy al ooit gemaak het?
Dit kan tyd, geld, energie, ens. wees.
‘n Onlangse belegging van tyd en energie was ‘n acting masterclass. Dis iets wat ek baie geniet het en my ook kon bemagtig om te groei as akteur. Enigiets wat dus vir iemand ‘n passie, ‘n ervaring, of iets is wat hul persoonlik of professioneel kan vorentoe help, is vir my ‘n goeie belegging. Nog ‘n onlangse aankoop wat ek baie geniet, is my PlayStation … maar dis dalk net ek.
Wanneer jy oorweldig of ongefokus voel, wat doen jy om dit te oorkom?
Wanneer ek oorweldig is haal ek myself uit die situasie uit. Ek neem ʼn tree terug om te verhoed dat ek ‘n keuse maak as gevolg van ‘n impuls.
Wat is die boek (of boeke) wat jy graag en mees dikwels as geskenk gee en hoekom?
Of, wat is die een tot drie boeke wat ’n groot invloed op jou lewe gehad het en hoekom?
Drie boeke wat ek baie geniet het was, The Subtle Art of Not Giving A F*ck (Mark Manson), The Book of Laughter and Forgetting (Milan Kundera), en Breyten Breytenbach se Rooiborsduif-digbundel. Boeke is vir my ‘n manier om my kop oop te maak, my horisonne te verbreed, en anders te leer dink. Al drie hierdie boeke het presies dit vir my gedoen.
As jy ’n massiewe buitelugadvertensiebord iewers kon oprig wat miljoene mense sou bereik, wat sou dit sê en hoekom?
Dit kan ’n paar woorde wees of ’n volledige paragraaf. Jy kan selfs iemand aanhaal.
Sjoe! Dis ʼn baie moeilike vraag. Van ʼn besigheidsperspektief af, sou dit sê DOWNLOAD DRONK & DANIG. Ek grap sommer! Ek sou dalk die woorde ‘’Vat dit rustig!’’ op ‘n buitelugbord plaas.
Wat is slegte advies wat jy al ten opsigte van jou beroep / vakgebied gehoor het?
Ek kan regtig nie enige slegte advies onthou nie. Ek dink ek is al van kleins af so ingestel dat as ek iets by iemand hoor wat my nie vorentoe gaan help nie, ek dit nie as belangrik ag nie. En dan eerder vergeet.