Is jy ‘n professionele taalwerker? Dan is die Virtuele Instituut vir Afrikaans (VivA) se jongste portaal presies waarvoor jy gewag het. Afrikaans.com beveel VivA ten sterkste aan vir gehalteversekerde, akademies begronde en geverifieerde vakinhoud oor Afrikaans.
Teksredaksieportaal is geskep vir elkeen wat hulle brood en botter in en met Afrikaans verdien. Boonop verstaan die mense by VivA maar alte goed waarmee jy daagliks te doen kry. As jou nering teksredakteur, vertaler, skrywer, Afrikaansonderwyser, predikant, of dergelik is, is jy ’n taalwerker. Ook studente wat Afrikaans as hoofvak of nagraads neem, kan baat by hierdie portaal. En terwyl jy nou in elk geval gaan loer wat daar aangaan, kyk sommer na die ander portale op die webblad. Wat ook al jou taalkwelling of -vraag, op VivA is daar ’n portaal waar jy die antwoord sal kry. Nog portale op die VivA-webblad:
Adviesportaal
Hier kry jy antwoorde op jou taalvrae.
Woordeboekportaal
Slaan na of ’n woord opgeteken is en hoe dit gespel word.
Inligtingsportaal
Kry toegang tot ’n verskeidenheid inligting oor Afrikaans, soos VivA se blog waar interessante taalverwante sake bespreek word, navorsingsprojekte en -resultate bekendgestel word en jy ingelig word oor kompetisies en spesiale aanbiedinge.
Taalportaal
VivA se vlagskipprojek wat oor ’n tydperk van vyf jaar geskep is. Vooraanstaande Afrikaanse taalkundiges het omvattende inligting oor die grammatika van Afrikaans, meestal in vergelyking met Nederlands en Fries, geskep. Die volgende word behandel:
- Klankleer (fonologie)
- Woordbou (morfologie)
- Sinsbou (sintaksis)
Jy kry ook toegang tot:
- ’n Databasis van Afrikaanse Taalkunde (DBAT) van die Noordwes-Universiteit
- ’n Glossarium van taalkundeterme
Meer besonderhede is beskikbaar by navraag@viva-afrikaans.org.
Korpusportaal
Hier kan navorsers soektogte doen.
Taalonderrigportaal
’n Oop, digitale ruimte waarin gehalteversekerde, akademies begronde en geverifieerde vakinhoud oor Afrikaans se grammatika vir die hele taalgemeenskap beskikbaar gestel word. Die afdelings:
Algemene Afrikaanse grammatika
’n Lewende bron waarin die grammatika van Afrikaans omvattend en in Afrikaans beskryf word. AAG is onder andere gebaseer op insigte in Taalportaal en sal deurlopend uitgebrei en bygewerk word.
AAG word ontwikkel met die oog op Afrikaanse taalkundenavorsers en -dosente, studente wat die vak Afrikaans op voor- en nagraadse vlak aanpak, onderwysers van Afrikaans en taalnuuskieriges wat antwoorde oor grammatikakwessies benodig.
Afrikaanse skoolgrammatika
‘n Bron met onderwysstudente en Afrikaansonderwysers in die VOO-fase as teikengebruikers.
ASG word nie deur die KABV gerig of beperk nie, maar die oogmerk is wel dat ASG by voltooiing van die projek die vereistes wat in die KABV rakende die onderrig van taalstrukture en -konvensies gestel word, volledig sal ondervang. Die KABV stel die vereistes – ASG verskaf die inhoud waarmee onderwysers en leerders aan die vereistes kan voldoen.
Addisioneel tot hierdie twee bronne word eietydse materiaal soos blogs, podsendings en video’s deurlopend geskep en op Taalonderrigportaal beskikbaar gestel om die grammatika van Afrikaans vir soveel as moontlik gebruikers toeganklik te maak.
Jy moet registreer om toegang te kry
Registreer gratis en kry toegang tot VivA se webblad vir die volledige aanbod.
VivA se blogs
Hier word talle taalkwessies en interessanthede bespreek. Gaan lees gerus die eerste blog in die reeks oor fonetiek/fonologie waarin VivA se fonologiekenner, Roné Wierenga, verduidelik wat ’n vokaal nou eintlik is, hoe dit van ’n diftong verskil en wat die verskil tussen ’n regte en onegte diftong is – ja, mense – ons het ook nie geweet nie!
Klik hier.
Bronne:
Nuusverklaring
VivA-webtuiste
