Kyk hier na die feesprogram.
Die Suidoosterfees en Atlantic Studios laat die klassieke inryteater herleef. Van 4 tot 15 November 2020 word feesproduksies in ’n splinternuwe baadjie geklee, en kan groter gehore vanuit die gemak en veiligheid van hul motors na feesaanbiedings op die silwerdoek kyk.
Produksies wat op die silwerdoek geprojekteer word, word direk opgeneem terwyl die kunstenaars op ’n buitelugverhoog optree. Inryteatergangers skakel in op ’n FM-radiofrekwensie om in hulle motors na die klankbaan te luister. Die geleentheid voldoen volledig aan vereistes ingevolge die COVID-19- nasionale gesondheids- en veiligheidsregulasies.
Volgens professor Brian Figaji, voorsitter van die Suidoosterfees-direksie, is gehore uitgehonger vir teater- en musiekproduksies. Die fees se inryteater bied ’n veilige uitlaatklep, danksy die ondersteuning van borge en die samewerking met Atlantic Studios. Dié inisiatief bied ’n alternatiewe opsie vir optredes en voorsien broodnodige inkomste aan kunstenaars. Inryteatergangers kan ook uitsien na heerlike ‘roadhouse’-etes wat vanuit die kykNET Kokkedoorstoor voorberei word.
Produksies om na uit te sien: Klopse Jol!, PJ Powers en die Tygerberg-kinderkoor, Die Variety Show that skriks vir niks, Lottering in Lockdown, Francois van Coke en Early B, Koortjies met Jonathan Rubain en Lag my kla’. Die vier topverkopers vir Suidoosterfees 2020, wat vroeër vanjaar as gevolg van die grendelstaat uitgestel moes word, was Kaapkreools, PJ Powers en die Tygerberg-kinderkoor, Die Variety Show that skriks vir niks en Marc Lottering. Gehore het nou die geleentheid om die nuwe produksies by die inryteater te geniet.
Emo en Loukmaan Adams tree in die produksie Klopse Jol! op saam met ’n eg Kaapse Maleierkoor, ’n Klopsegroep en ’n tienstuk-orkes wat die voete sal laat jeuk. Die legendariese PJ Powers snoer talente met die Tygerberg-kinderkoor saam om ’n onvergeetlike musiek-extravaganza na die inryverhoog te bring. Feesgangers kan uitsien na treffers soos ‘Welcome to Africa’, ‘The right to learn’, ‘Jabulani’, ‘The world in union’ en ’n massauitvoering van ‘Shosholoza’.
Gehore kan ook uitsien na ’n gesamentlike optrede van Francois van Coke en Early B – Suid-Afrika se grootste rocker en rymkletser saam op een verhoog! Gary Naidoo tree op in Die Variety Show that skriks vir niks, ’n vertoning wat die verhoog in ligte laaie laat opgaan met skreeusnaakse komedie en ’n jol soos net die Kaap kan gooi. In Marc Lottering se produksie vertel die supergewilde grapjas van sy avonture gedurende die grendelstaat. Kom skaterlag saam vir sy weergawe van aanlyn vergaderings en tuisonderrig.
Lag my kla’ is die uitvloeisel van ’n aanlyn kompetisie wat van stapel gestuur is om nuwe komedie-talent te identifiseer vir verdere ontwikkeling. Met dié projek van Son, kykNET en die Suidoosterfees het Shimmy Isaacs, Rezah Forbes en Solomon Cupido nuwelinge se talent geslyp. Die wenners van 2020 se Lag my kla’-kompetisie tree saam met hulle op.
Die eerste Afrikaanse gospel-televisiereeks, Koortjies met Jonathan Rubain, is een van die gewildste reekse ooit op kykNET en Kie. Gaste wat in die reeks te sien was, kom byeen vir ’n aanskoulike verskeidenheidsvertoning by die inryteater.
Vir Stad Kaapstad is die kykNET Atlantic Inryteater die ideale geleentheid om die kunste weer behoorlik te vier ná die grendelstaat. Daarom gooi Kaapstad haar deure wyd oop om kunsteliefhebbers van oral in die provinsie te verwelkom. Spesiale pakkette word aangebied om dit vir besoekers van buite die stadsgrense moontlik te maak om te kom deel in vermaak uit die boonste rakke. Verblyfpakkette by City Lodge is beskikbaar teen R1 600 vir twee persone, en sluit bed en ontbyt, ’n inryteaterkaartjie en ‘roadhouse’-ete in.
Kaartjies kos vanaf R250 per motor, en kan by Computicket bespreek word. Besoek die Suidoosterfees se webwerf (www.suidoosterfees.co.za) vir meer inligting.
Hierdie inisiatief van die Suidoosterfees is moontlik gemaak deur die Departement van Kuns, die Wes-Kaapse Departement van Kultuursake en Sport, Stad Kaapstad, kykNET, NATi, Die Burger, Media24, Smile FM en Atlantic Studios.
Vir verdere navrae, tree asseblief met Themba Mzondi in verbinding by 078 113 5216 of per e-pos Themba@sceproductions.co.za
BUITE KAAPSTAD, MAAR STEEDS GRETIG OM BY TE WOON? MOENIE HIERDIE SPESIALE PAKKET MISLOOP NIE!
’n Spesiale afslagpakket is beskikbaar vir besoekers wat lus is vir ’n paar dae se wegbreek na Kaapstad. “Met ’n knypende ekonomie wat Suid-Afrikaners hul sente laat omdraai, veral ná die pandemie, het ons besparende pakkette vir ons ondersteuners saamgestel,” sê Jana Hattingh, die fees se uitvoerende hoof. “Dit is vir ons belangrik om die kunste so toeganklik moontlik vir almal te maak. En ons wil dit vir besoekers uit dorpe rondom Kaapstad bekostigbaar maak om die fees by te woon.”
Kostes vir die inryteater beloop R250 per motor vir twee persone, en R300 per motor vir drie of vier mense. Vir besoekers wat in Kaapstad wil oornag, is daar ook ’n winskoop-pakket beskikbaar. Vir slegs R1 600 kan twee feesgangers die volgende waarde kry: Bed en ontbyt by City Lodge Hotel V&A Waterfront, toegang tot die fees se inryteater, en ’n Kokkedoor-ete daarby ingesluit. Besprekings kan telefonies by die City Lodge V&A Waterfront gedoen word. Mense wat van dié aanbod gebruik wil maak, kan die hotel by 021 419 9450 skakel om te bespreek.
