Almal by Raithby Primêr is dit eens: “Enigiets is moontlik in jou eie taal!”
René Arendse
“Hierdie muur sê vir my ek kan enige iets wees!”
sê Nathi Marafane, ‘n graad 7-leerder by Raithby Primêr.
“Die muurskildery het ons leerders en onderwysers stomgeslaan. Hulle kon nie glo toe hulle Maandagoggend hier instap en begroet word deur hierdie helderkleurige muur nie! Afrikaans.com het alles so glad en vinnig laat gebeur dat ons die hele skoolgemeenskap kon verras.”
Mnr. Ruben Steyn, die waarnemende prinsipaal by die pragtige skooltjie in Raithby, net buite Somerset-Wes.
Mnr. Ruben Steyn, waarnemende prinsipaal by Raithby Primêr.
Adri Arnolds en Kayleigh Lintnaar vermaak die gehoor tydens die spesiale program.
Raithby Primêr is die tweede oudste Afrikaanse skool in die omgewing en het ‘n besonderse geskiedenis. Dit is in 1845 as ‘n opvoedkundige hawe vir die vrygelate slawe se kinders gebou. Weggesteek in die pragtige omgewing, vind jy hierdie plekkie met die naam Raithby.
Selfs Covid-19-protokol kon nie verhoed dat die leerders en personeel die Afrikaans.com-muuronthulling op Vrydag, 16 Oktober 2020, ten volle geniet nie. Afgesien van maskers en sosiale afstand wat gehandhaaf moes word, het die leerders hulself gate uit geniet, items voorgedra en die inspirasie en vermaak van Frazer Barry geniet.
Leerders is opnuut daaraan herinner dat hulle die uniekheid en diversiteit van hulle taal moet vier en eienaarskap van hulle taal en identiteit moet neem. Ten spyte van al die uitdagings en beperkings van 2020, is Afrikaans.com trots om die jaar saam met Raithby Primêr en sy wonderlike leerders en personeel die dag te kon deel en geniet. Met die muurkunsprojek poog Afrikaans.com om die lekker en positiewe van Afrikaans in skoolverband uit te lig en te vier, om leerders te inspireer sodat hulle sal onthou dat hulle toekoms in hulle hande is en dat enigiets moontlik is in jou eie taal!
Links na regs- Frazer Barry, Ruben Steyn (prinsipaal) René Arendse en Gordon Olivier (HOD).
Die kunstenaar, Frazer Barry is op sy stukke tydens die muuronthulling.
Die uitnemende kunstenaar en skrywer, Frazer Barry, het die leerders inspireer met sy eie storie van die seun wat bo sy omstandighede kon uitstyg en vandag sy drome in sy eie taal kan uitleef. Frazer, gebore en grootgeword in Kleinmond, is al vir meer as 20 jaar besig om verhoë beide nasionaal en internasionaal te betower met sy unieke Afrika-klanke. Hy het al verskeie toekennings ontvang en is vanjaar met sy produksie Woorde op akkoorde, vir ‘n KykNET Fiësta-toekenning genomineer.
“Ons voorsien ‘n blink toekoms vir Afrikaans in die hande van leerders soos dié by Raithby Primêr!”
René Arendse, Afrikaans.com
Die kunstenaar en skrywer Frazer Barry wat by die muuronthulling opgetree het, gesels met ons oor wat sy Afrikaans vir hom beteken.
