NB-Uitgewers se reeks kinderboeke. Word deel van die boekwurmbende en WEN!

1

Ouma Hester en die Getaway-kar

Janie Oosthuysen, Alex van Houwelingen, Alistair Ackermann.

ISBN: 9780798180726

Uitgewer: Human & Rousseau

Zany Zack voer ‘n skrikbewind by VERI HAPPI KIDZ, die videospeletjiesfabriek. Met die hulp van vier bose oumas van die Huur-‘n-Ouma-agentskap word kinders ontvoer en gedwing om dag en nag te werk om nuwe speletjies uit te dink. Maar gelukkig is daar ook oumas soos ouma Hester, Tian en Lisa se ouma. Haar Getaway-kar se wapens skrik vir niks en Tian en Lisa leer hoe om elke vernuftige toestel te gebruik in hul stryd teen die bose oumas. Saam beleef hulle woeste gevegte, jaagtonele, en hope naelbyt-spanning en -aksie. Die vakansie by ouma Hester gaan beslis onvergeetlik wees!

2

Jungu Josh 1: Die goue kalbas 

Constant van Graan

ISBN: 9780624090779

Uitgewer: Tafelberg Uitgewers

Josh woon by sy tannie op ‘n plaas in Oos-Afrika nadat sy ma skielik verdwyn het. ‘n Vreemdeling daag op en probeer  hom ontvoer. Doris, die huishulp, red hom. Sy vertel hom dat ‘n groep mense sy bloed soek en dat hy in die vallei, Kalimbula, die wyseman, Ngandu, moet gaan spreek om antwoorde te vind. Josh pas die legkaartstukkies van sy ma se verdwyning stadig bymekaar, maar toe die goue kalbas oopgemaak word om die naam van die troonopvolger te onthul, kry Josh die verrassing van sy lewe . . .

3

Ontdek: Insekte

Laurence Mound

ISBN: 9780798181105

Uitgewer: Human & Rousseau

Hierdie boek gee nuuskierige agies ‘n kans om in detail alles oor insekte te leer, met ongelooflike foto’s wat daarmee gepaardgaan. Die inhoud dek onder andere die dele van ‘n insek, wat  ‘n insek is, die eerste insekte, kewers, vlieë, skoenlappers en motte, wespe, bye en miere, ander insekte, vyande, insekte in die water, hoe neste gebou word, miere, heuningbye en korwe, en meer. Die boek sluit af met ‘n Het jy geweet?-afdeling, insekklassifikasie, plekke om te besoek én ‘n woordelys.

4

Bitterbosbende 1
Die geheim van die nuwe hoof

Anzil Kulsen, Stephen Wallace

ISBN: 9780624090434

Uitgewer: Tafelberg Uitgewers

Kurt, sy suster Nieke en hul maats is in graad 5 in Laerskool Bitterbos, en bly in die koshuis. Die nuwe skoolhoof waai soos ‘n yskoue onweerswind by die eerste saalbyeenkoms in. Daar’s ‘n NW-taak wat moet klaarkom, as groepwerk! Toe Kurt-hulle se idee vir ‘n sonkragoondjie TE goed werk en hulle ‘n mini-ontploffing in die vierkant veroorsaak, word hulle na die hoof se kantoor ontbied – met verrassende gevolge …  

5

Eisteddfod-pret 2
Nog gedigte, monoloë en samesprake vir die laerskool

Gloudine Kellerman, Jonelle du Toit, Tumi Steyn

ISBN: 9780798180245

Uitgewer: Human & Rousseau

Hierdie versameling van 108 oorspronklike gedigte, 24 monoloë en 20 samesprake volg op die baie suksesvolle eerste titel in die reeks en is weereens perfek geskik vir laerskoolleerders. Elkeen van hierdie werke het die potensiaal om die hoogste punte by ‘n eisteddfod te verwerf. Louise Lachenicht se riglyne vir ouers, onderwysers en afrigters – met ‘n fokus op gedramatiseerde poësie – verseker dat elke deelnemer hul beste werk kan lewer. 

6

Kies-jou-avontuur: Die gevaarlikste speletjie op aarde

De Wet Hugo, Johann Strauss

ISBN: 9780798180696

Uitgewer: Human & Rousseau

Mario is die skool se rekenaarspeletjie-kampioen. Maar wanneer hy deur ‘n eienaardige nuwe speletjie weggevoer word na die kuberruim, moet hy veg om sy lewe. ‘n Geheimsinnige wese genaamd Gigabyte verduidelik dat hy na die sewe wonders van die antieke wêreld moet reis om ses goue muntstukke te vind, voordat hy kan terugkeer huis toe. Lewensgevaarlike uitdagings wag op hom . . .
‘n Kies-jou-eie-avontuur-storie propvol avontuur en naelbyt-aksie!