Vir die eerste keer sedert SARIE se gewilde Voorbladgesigwedstryd tien jaar gelede begin het, het die tydskrif vanjaar ’n nuwe afdeling, SARIE Nuwe Gesig, geloods. Hierdie kompetisie het aan jong leerders tussen die ouderdom van 16 en 18 jaar die geleentheid gebied om moontlik weg te stap met die titel as die SARIE Nuwe Gesig-wenner van 2020, ’n jaar se tienervelsorgbehandelings van die Isa Carstens Akademie en ’n kontantprys van R10 000 van Afrikaans.com.
Die jong dames moes elk drie foto’s van hulself instuur en ook aktief aanlyn deelneem met die hutsmerk #Jyisgenoeg.
Jonadrie van Aardt is ’n paar dae gelede by haar skool, Hoërskool Jan van Riebeeck, deur die SARIE-redakteur, Michelle van Breda, met die nuus verras dat sy aangewys is as die heel eerste SARIE Nuwe Gesig-wenner. Vandag pronk sy op die voorblad van SARIE se kleiner “handsak”-weergawe – ’n droom wat sy nooit gedink het waar sou word nie.
Afrikaans.com het met Jonadrie gesels om uit te vind wat #Jyisgenoeg vir haar beteken, wat haar toekomsplanne is en hoe dit voel om jou gesig op een van die mees ikoniese tydskrifte in die land te sien.
Wat het deur jou kop gegaan toe jy hoor jy is SARIE se heel eerste Nuwe Gesig 2020?
Ek weet nie presies wat deur my kop gegaan het toe ek my naam hoor nie … my hartklop was veels te hard! Dit was ’n onwerklike gevoel, een van die bestes nog.
Die eerste ding waaraan ek kon dink, was hoe tevrede ek uiteindelik met myself was, hoe trots en sterk ek op daardie oomblik gevoel het. Dit het soos ’n feëverhaal gevoel, asof ek nou net die wêreld oorwin het!
SARIE se wekroep vir 2020 is #Jyisgenoeg. Hoekom dink jy is die boodskap van hierdie hutsmerk so belangrik?
#Jyisgenoeg – iets só na aan my hart en een van dié belangrikste hutsmerke nóg! Ek dink die samelewing stel ’n belaglike standaard van perfeksie waarna elke jong dame streef. Dis eintlik so hartseer, want ek was self al daar.
Ek het op die jong ouderdom van 14 die modelindustrie betree en daar was konstant vir my gesê dat ek dit nie gaan maak tensy ek my “beauty spot” bo my oog verwyder nie. Dit was ’n bitter groot hindernis vir my. Ek was skaam daaroor. “Jy is genoeg!”. Dis al wat ek altyd wou hoor. Maar ek was nooit, of nie volgens die wêreld of die industrie nie. Hierdie boodskap stem dus presies ooreen met dit wat ek aan dames wil oordra: JY, presies wie en hoe jy nou is – daardie onperfekte jy – DIT IS GENOEG!
Hoe voel dit om jou gesig op een van die bekendste tydskrifte in die land te sien?
Die tydskrif is op my 18de verjaarsdag vrygestel en dit was die beste geskenk waarvoor ek kon vra! Daar is geen woorde wat kan beskryf hoe lekker dit voel om myself daar te sien nie. Dit wys net dat jy regtig enigiets kan doen as jy jou hart daarin sit. En dit waardeur jy moet gaan om daar uit te kom, vorm deel van jou wonderlike storie. Dit is ’n bedekte seën.
Hoekom moet ander meisies inskryf vir die kompetisie?
Want daar is nie een rede hoekom hulle nie moet inskryf nie! Daar kan net goed daaruit kom. Die ervaring is iets besonders. Jy het niks om te verloor nie, maar jy ondergaan soveel selfontwikkeling en jy leer jouself regtig ken in die proses en besef dat jy eintlik só baie werd is in hierdie lewe. Dit is iets wat elke jong dame behoort te leer. Jy is beslis ’n voorblad werd!
Wat is die belangrikste ding wat jy tydens hierdie kompetisie geleer het?
Ek het geleer dat ek genoeg is nes ek is, dat ek myself kan wees en dat ek soveel meer kan bereik deur net ék te wees. Jy het ’n krag in jou wat jou onstuitbaar maak. Jy moet dit altyd op die regte maniere gebruik. Wees net wie jy is.
Wat hou die toekoms vir jou in?
Ek is baie lief vir die skoonheidswêreld en ek geniet dit vreeslik om met mense te werk. My toekomsplanne is nog nie heeltemal uiteengesit nie, ek gaan volgende jaar gebruik om te werkskadu by plekke soos Isa Carstens om uit te vind watter planne ek werklik in ’n loopbaan wil verander. Ek sal graag my eie skoonheidsalon wil besit. Modelwerk sal ook altyd deel van my storie wees en wie weet, dalk skryf ek nog eendag vir Mej. SA in!
Jy is Afrikaans en gaan ook skool in Afrikaans. Wat is vir jou die lekkerste deel van Afrikaanswees en hoe leef jy dit elke dag uit?
Afrikaans is ’n bitter belangrike deel van my menswees. Dit vorm deel van wie ek is en ek is verskriklik trots op my taal! Die lekkerste deel van Afrikaanswees is om te weet ek is deel van ’n groter Afrikaner-familie, dat ek in my eie taal kan inspireer en ’n verskil maak deur net myself te wees en myself op die beste manier moontlik uit te druk – deur Afrikaans! Ek praat, lees, skryf en leef in Afrikaans. Dis net wie ek is.
Wat is jou gunsteling- Afrikaanse woord?
My gunsteling- Afrikaanse woord is beslis “skitter”. Ek voel die woord praat vir homself en in hierdie donker wêreld het elkeen van ons ons eie manier van skitter om die wêreld ’n beter plek te maak. Ek glo jy moet die bul aan die horings gryp, jou drome najaag en al die pad SKITTER!
