Wie is ons?
Verskeie organisasies en individue met ’n liefde en passie vir Afrikaans het saamgekom om Afrikaans in haar verskillende vorme te vier en te verken. Ons nooi jou saam op hierdie ontdekkingstog die wye Afrikaanse landskap in. Ons vra mede-avontuurlustiges om jul unieke Afrikaanse leefwêrelde met ons te deel en ons te verras met jul uitkyk op en ervaring van Afrikaans. Afrikaans se horisonne is wyd en haar karakter is so eiesoortig soos elke mens wie se wortels in hierdie kontinent geanker is.
Laat weet ons hoe lyk jou Afrikaans!
Ons visie
Afrikaans.com is daarop gemik om die diversiteit en skoonheid van Afrikaans te vier en te verken. Op Afrikaans.com sal jy alles vind oor Afrikaans. Alle groot organisasies, feeste, optredes en projekte word hier bemark met deurklik-skakels na die verwante webtuistes. Hierdie platform is ‘n bymekaarkomplek vir alle mense wat hulself deel voel van die taalfamilie (hetsy naby, verlangs of terloops) en vir enigeen wat meer oor die taal en sy bedrywighede wil weet of sommernet nuuskierig is oor die Afrikaanse leefwêreld. Die onderwerpe is byvoorbeeld Ontspan, Beleef, Leer en Deel met afdelings vir musiek, boeke, kos ‘n nuttige feeskalender en ‘n webkatalogus met bakens om jou soektog deur die Afrikaanse landskap te vergemaklik.
By Afrikaans.com vertel ons besoekers van bestaande organisasies, projekte en navorsing, geleenthede en verwikkelinge in Afrikaans. Ons bied inligting vir die leek en die kundige, vir die nuuskierige en die ingeligte, op ‘n vars en vernuwende manier.
Afrikaans.com is ´n lewendige, dinamiese en organiese kanaal wat ‘n diens lewer aan die gebruiker.
Afrikaans.com stel ten doel:
- Om ‘n nuttige saamkomplek vir gebruikers van Afrikaans te skep en die voortou te neem in die skep van ‘n aanlynbeweging wat Afrikaans positief bemark en beïnvloed.
- Om ´n sterk, lewendige aanlyngemeenskap te ontwikkel, gesentreer rondom gebruikersbehoeftes.
- Om ´n persoonlike verwysingsraamwerk van inligting, vermaak en opvoeding vir die gebruiker te wees wat ten alle tye toeganklik is waar gebruikers ook al beweeg.
- Om nuttige inligting aan te bied.
Die Afrikaans.com-handelsmerk kan deur die volgende woorde beskryf word:
- vier
- verken
- inlig
- vermaak
- opvoed
- bemagtig
Afrikaans.com en die Veldtog vir Afrikaans word deur Dagbreek Trust gefinansier.
Veldtog vir Afrikaans
Afrikaans.com word ondersteun deur verskeie veldtogte. Die eerste (Hoe lyk jou Afrikaans?) was ’n bewusmakingsveldtog wat verkeer na die webtuiste aangemoedig het, Afrikaans as handelsmerk gevestig en bevorder het en die taal op ‘n positiewe wyse uitgebou het. Die veldtog is deur middel van buitelugborde, asook redaksionele en advertensieblootstelling op televisie en radio en in die drukmedia gedryf. Die kernboodskap van die advertensieveldtog was: Hoe lyk jóú Afrikaans? Die idee was om mense se belangstelling te prikkel en Afrikaanssprekendes, maar ook alle Suid-Afrikaners, te nooi om die webtuiste te besoek en deel te neem aan die kompetisie: Hoe lyk jou Afrikaans en WEN!
Die tweede veldtog wou weet: “Wat van Afrikaans is vir jou #onmisbaar?” Die veldtog is weer eens deur middel van buitelugborde, redaksionele en advertensies en borgskappe op televisie en radio en in die drukmedia gedryf.
Afrikaans.com is ‘n webtuiste waar jy Afrikaans se sjarme, eiesoortigheid en kleurrykheid kan vier en verken in samewerking met en tot voordeel van die reeds bestaande projekte en organisasies.
Projekte
Afrikaans.com muurkunsprojek: #Droomgroot.
Afrikaans is die taal van al sy sprekers. Tog het nie almal in alle gemeenskappe ewe veel toegang tot die viering van hul taal nie. By Afrikaans.com glo ons dat inspirasie tot aspirasie lei en my identiteit van wie ek is en hoe ek myself uitdruk, ’n trots en eiewaarde skep. Daarom het ons ook vanjaar baie spesifieke gemeenskapsprojekte waardeur ons veral skoolleerders deur visuele muurprojekte wil inspireer.
Beskermhere en -vroue
Afrikaans.com se beskermhere en -vroue is voorlopers op hul gebied en dien as aansporing en inspirasie ter viering van Afrikaans se eiesoortigheid, inklusiwiteit en nut.
Ambassadeurs
Ons Ambassadeurs is mense met ‘n hart vir Afrikaans. Hulle werk vir Afrikaans, neem eienaarskap op grondvlak en inspireer ander. Hulle suksesstories het een ding in gemeen: Afrikaans is die held. Elke Ambassadeur vir Afrikaans maak ‘n wesenlike bydrae tot Afrikaans en die Afrikaanse leefwêreld. Hier gee ons erkenning aan mense wat hul passie vir Afrikaans lééf!
Kontak ons
Hier sien jy die taal getooi in al sy diepte, eenvoud, grootsheid en nederigheid. Afrikaans.com is die plek vir die Afrikaanse taalfamilie – hetsy naby, ver langs of terloops … Dit is ‘n avontuurtog die toekoms in. Vind hier ons kontakvorm vir saamgesels en vrae. Tree toe en neem deel!
