Die modebedryf is erg kompeterend … en Engels. Wanneer ‘n Afrikaanse mansmodel, boonop van ‘n plaas in die Vrystaat, dus die koppe laat draai, is dit net te spesiaal om dit nie met julle te deel nie. Ontmoet vir Rudi Nieuwenhuys!

Glo dit of nie, maar dié aantreklike gesig in die foto’s, het nie uit ‘n Hollywood-rolprent ontsnap nie en is ook nie een of ander loopplankmodel uit Europa nie. Hy is ‘n trotse Afrikaanse boerseun met ‘n hart vir die natuur en mooi musiek en het boonop ‘n kop vir syfers ook.

‘n Modelloopbaan was glad nie wat Rudi vir sy lewe beplan het nie. Hy was eintlik heel gevestig in ‘n pos as korporatiewe risiko-adviseur in die Kaap toe ‘n vriendin sy arm gedraai het om aan ‘n modekompetisie deel te neem. Alhoewel hy toe nie gewen het nie, het ‘n talentagentskap hom raakgesien. Só het dinge toe vir hom in plek begin val en het hy vir hom ‘n stewige loopbaan in ‘n baie opwindende bedryf losgeslaan, waarvan hy die vryheid en die interessante mense wat hy ontmoet vreeslik geniet.

Annelien van Basten het met hom gaan gesels oor Afrikaans- en Suid-Afrikaans-wees in ‘n bedryf waar enige ander taal, behalwe sy moedertaal, koning kraai en daar baie wanpersepsies oor ons land bestaan.

Dink jy ‘n deeglike kennis van jou moedertaal het jou gehelp om suksesvol te wees in jou loopbaan?
“In my ondervinding, is Afrikaans ongelukkig nie meer in die korporatiewe sektor so van belang wanneer daar met buitelandse maatskappye geskakel word nie, omdat kommunikasie maar in Engels geskied. Ek voel egter dat ‘n deeglike kennis van Afrikaans in my huidige beroep meer as ooit vir my van toepassing is. Waar ek ookal gaan, is mense baie geïnteresseerd in my aksent, moedertaal en die oorsprong daarvan. In Europa is daar heelwat taalooreenkomste (Nederlands, Duits, Vlaams) en taal is gereeld ‘n in-diepte onderwerp van bespreking.”

Rudi se gunstelinge …

Watter geleenthede is daar vir Afrikaanse mense oorsee? 
“Natuurlik is Engels altyd ‘n vereiste wanneer jy buite die land is. Tog voel ek dat my Afrikaanse agtergrond my al telkemale in die modelbedryf bevoordeel het. Afrikaners (en daar is heelwat van ons wat modelle is) het ‘n ongelooflike goeie reputasie regoor die wêreld as warm, opregte en hardwerkende mense. Brasiliërs het ook nogal ‘n soortgelyke reputasie.”

Moes jy al ooit terugstaan as gevolg van jou aksent? 
“Nee, maar ek is al op ‘n paar geleenthede aangevat oor die geskiedenis van ons land. Mense is geneig om sterk opinies oor ons mense te hê, met ‘n baie beperkte kennis van die waarheid.”

Rudi Nieuwenhuys. 

Foto – Amar Metha.

Foto – Anna Fichtner.

Wat beteken Afrikaans-wees vir jou?
“Ek voel ons is uniek. ‘n Klein groepie mense wat so invloedryk is in alle aspekte van die samelewing, hier en oorsee. Ek is trots Afrikaans en ek staan nooit terug daarvoor nie. Dit is tog vir my jammer dat daar steeds plek-plek ‘n wanpersepsie oor ons kultuur bestaan.”

Hoe kan ons ons taal aan die gang hou?
“Kinders moet ons taal leer. Daar is van ons ouers wat hulle kinders in Engelse skole sit en selfs nie eers by die huis Afrikaans praat nie. Selfs die kinders se name is Engels. Voortdurende innovering in die Afrikaanse vermaaklikheidsbedryf is ook nodig om mense geïnteresseerd te hou en om die taal te laat groei.”

Wie is jou rolmodelle?
“Moderne rolmodelle is geneig om baie geheime te hê en ouer rolmodelle is geneig om perfek te wees, so ek sou sê my ouers is my rolmodelle. Hulle het vir my al my waardes en beginsels geleer en vandag kry ek steeds baie komplimente daaroor.”

Foto – Brooks Brothers. 

Foto – Enrico Marinelli.

Foto – Florian Grey.

Het jy raad vir diegene wat in jou voetspore wil volg?
“Dit is nooit te laat nie. Ek was amper dertig toe ek my loopbaan as model begin het en ek het nooit teruggekyk nie. Tog moet jy jou geleenthede gebruik en jouself vertrou. Dit is beter om spyt te wees oor dit wat jy wel gedoen het as dit wat jy nooit gedoen het nie.”

Deel ‘n fliek en boek in jou moedertaal wat jy baie geniet het.
“Enigiets deur Deon Meyer en Die Wonderwerker.”

As jy hom vra watter Afrikaanse woorde vir hom die mooiste klink, verklap hy met ‘n vonkel in die oog dat ‘liefie’, ‘bakkie’, ‘beeldskoon’, ‘eina’ en ‘hottentotsgot’ vir hom lekker klink en baie pret verskaf wanneer hy dit vir buitelanders probeer leer.

Die beste raad wat hy al ooit gekry het, was om weg te bly van wat almal doen en te doen waarvan almal af wegbly … en ons is bly hy doen wat hy doen. Mooi was immers nog nooit lelik nie.

Klik op die skakels hier onder om van Rudi se werk in ‘lewende lywe’ te sien:
www.conleys.de, http://www.campione.de/de/, of volg hom op sosiale media: facebook of instagram.

Kyk ook hier wat sê Rudi oor Afrikaans …